रामेछाप– नेकपा एमाले रामेछापको अध्यक्षमा आनन्द कुमार श्रेष्ठ निर्वाचित भएका छन् । अध्यक्षका दुई प्रतिस्पर्धी प्रेम बहादुर तामाङ र झम्क कंडेलले उम्मेद्वारी फिर्ता लिएपछि श्रेष्ठ सर्वसम्मत अध्यक्ष भएका हुन् ।
सर्वसम्मत अध्यक्ष बनेका श्रेष्ठले अध्यक्षमा उम्मेद्वारी घोषणा गर्दा पार्टीलाई थप बलियो बताउने, पार्टीलाई सुदृढीकरण गर्दै एकताबद्ध बनाउने, नेकपा एमालेलाई राजनीतिक र बैचारिक हिसाबले थप सुदृढ बनाउदै अग्रजहरुको सम्मान एवं भावी पुस्ताको आशा र विश्वासको पार्टी बनाउने लगायतका योजना आफूसँग रहेको बताउँदै आएका थिए ।
अध्यक्षमा सहमती भएपनि उपाध्यक्ष, सचिव, सहसचिव र सदस्यहरुमा मतदान नै हुने देखिएको छ । अन्य पदाधिकारी र सदस्यको पदमा पनि सर्वसम्मत गराउनको लागि सहमतीको प्रयास जारी राखिएको एमालेक एक नेताले बताए ।
यस्तो छ श्रेष्ठको राजनीतिक यात्रा
आनन्द कुमार श्रेष्ठ सानै देखि राजनीतिमा सक्रिय रहेपनि २०५०/०५१ साल देखि २०६२/०६३ साल सम्म नेकपा एमालेको विद्यार्थी संगठन अनेरास्ववियूको राजनीतिमा जिल्ला तथा जिल्ला बाहिर क्रियाशील रहे । करिव एक दशक पार्टीको विद्यार्थी संगठनमा सक्रिय रहेका श्रेष्ठले विद्यार्थी राजनीतिको क्षेत्रमा महत्वपूर्ण मानिने स्वतन्त्र विद्यार्थी युनियन क्याम्पसहरुको नेतृत्वदायि भूमाकामा रहेर समेत काम गर्ने मौका पाए । नेपाल कमर्स क्याम्पस काठमाण्डौको स्वतन्त्र विद्यार्थी युनियनमा २०५२ साल देखि २०६० साल सम्म क्रमशः सदस्य, सचिव हुँदै सभापति भएर काम गरेको अनुभव पनि श्रेष्ठसँग छ ।
श्रेष्ठले एमालेको विद्यार्थी संगठन अनेरास्ववियूको प्रारम्भिक कमिटी, क्याम्पस कमिटी, जिल्ला कमिटी र अंचल कमिटीको अध्यक्ष, राष्ट्रिय परिषद्को सदस्य, अनेरास्ववियूको केन्द्रीय सदस्य हुँदै अनेरास्ववियूकै सचिवालय सदस्य सम्म भएर काम गरेका थिए ।
पार्टीको उपत्यका विद्यार्थी विशेष जिल्ला कमिटीमा दुई कार्यकाल संगठन विभागको प्रमुखको रुपमा काम गरेका श्रेष्ठ २०६५ / ०६६ सालबाट विद्यार्थी राजनीतिलाई छोडेर पार्टीको मूल राजनीतिमा फर्किए ।
विद्यार्थी राजनीति छोडेर पार्टीको मूल राजनीतिमा फर्किएका श्रेष्ठले २०६६ साल देखि लगातर नेकपा एमाले रामेछाप जिल्लाको मूख्य भूमिकामा रहेर काम गरे । पार्टी भित्र काम गर्दा श्रेष्ठले जिल्ला सदस्य, विद्यार्थी इन्चार्ज, सचिवालय सदस्य हुँदै ९ वर्ष सम्म एमाले रामेछापको जिल्ला सचिव भएर काम गर्ने मौका पाए ।
नेकपा एमाले र नेकपा माओवादी केन्द्र मिलेर बनेको नेकपा भित्र अन्तर संघर्ष हुँदा पार्टीले श्रेष्ठलाई अध्यक्ष समेत बनाएको थियो । एमाले पार्टीमा संकटको बेला समेत श्रेष्ठले अध्यक्षको जिम्मेवारी लिएर काम गर्ने मौका पाएका कारण उनिसँग अध्यक्ष हुँदाको पनि अनुभव छ । श्रेष्ठ पार्टीको ८ औँ र १० औँ राष्ट्रिय महाधिवेशनको प्रतिनिधि समेत हुन् ।
