रामेछाप- रामेछापकी बिनिति खड्काले नेपाली काँग्रेसको केन्द्रीय सदस्यमा उम्मेद्वारी दिने घोषणा गरेकी छिन् । नेपाली काँग्रेको १४ औँ माधिवेशनमा आफू खस–आर्य महिला तर्फबाट केन्द्रीय सदस्यमा उम्मेद्वारी दिने घोषणा गरेकी हुन् । बिहिवार उम्मेद्वारी घोषणा गर्दै हजुरबा उमेरकाले काँग्रेस हाँकीरहेको र अब नातिनी उमेरकाले काँग्रेस हाक्ने जिम्मेवारी लिने अवस्था आएकाले आफूले उम्मेद्वारी दिन लागेको बताइन् ।
१३ औँ महाधिवेशनमा २० वर्षको उमेरमा सबै भन्दा कान्छी महाधिवेशन प्रतिनिधि बनेर चर्चामा रहेकी खड्का १४ औँ महाधिवेशनमा केन्द्रीय कार्यसमितिमा सबै भन्दा कान्छी सदस्य बन्ने दाउमा केन्द्रीय सदस्य जित्ने अभियानमा लागेकी छिन् । कांग्रेसमा युवाको हस्तक्षेपका लागि युवाहरु एक भएर लाग्नु पर्ने बताउँदै १४ औँ महाधिवेशनबाट त्यो अभियान चलाउन सुरु गरिएको उनले बताइन् ।
२०७४ सालको स्थानीय तहको निर्वाचनमा उनी रामेछापको सुनापति गाउँपालिकाबाट काँग्रेसको तर्फबाट उपाध्यक्ष उम्मेदवार बनेकी थिइन् । तर, उनले जित भने हासिल गर्न सकिनन् ।
काँग्रेस रामेछापका नेता पिता भुवन खड्का र काका बद्री खड्काको प्रेरणाबाट राजनीतिमा होमिएकी खड्काले १४ औँ जिल्ला अधिवेशनबाट महिला तर्फ सबै भन्दा बढी मत ल्याएर महाधिवेशन प्रतिनिधि बनेकी थिइन् ।
अघिल्लै महाधिवेशनमा केन्द्रीय सदस्य बन्न खोज्दा क्रियाशील सदस्यताको समयावधि नपुगेकाले आफू बन्चित भएको खड्काको भनाइ छ । विद्यालय तहदेखिनै नेविसंघबााट राजनीति थालेकी खड्का जिल्लाबाट केन्द्रमा बलियो उपस्थिति जनाउन आफू उम्मेदवार बनेको बताउछिन् ।
खड्का जिल्ला तथा जिल्ला बाहिर समाजसेवीको रुपमा समेत परिचित छिन् । उनि लगायत उनको टिमले ग्रामिण क्षेत्रका विद्यालयका विद्यार्थीहरुलाई शैक्षिक सामाग्री, जाडोमा लगाउने न्यानो कपडा लगायतका सामाग्री वितरण गर्दै आएका छन् ।
नेपाली काँग्रेसको केन्द्रीय महाधिवेशन मंसिर २४ गतेबाट सुरु भएर मंसिर २७ गते सम्पन्न हुने गरी कार्यतालिका सार्वजनिक भइसकेको छ ।
