रामेछाप– नेपाली काँग्रेस बागमती प्रदेशको सभापतिमा इन्द्र बानियाँ निर्वाचित भएका छन् । आइतबार भएको दोस्रो चरणको निर्वाचनमा १ हजार ८५ मत ल्याउँदै बानियाँ बागमती प्रदेश सभापतिमा निर्वाचित भएका हुन् । बानियाँका निकटतम प्रतिद्वन्द्वी जगदीश्वर नरसिंह केसीले ९ सय २७ मत प्राप्त गरेका छन् । दोस्रो चरणको निर्वाचनमा २ हजार २६ मत खसेको थियो । बानियाँले केसीलाई १ सय ५८ मतान्तरले पराजित गरेका हुन् । २ हजार २६ मतमा १४ मत बदर भएको निर्वाचन समितिले बताएको छ ।
सभापतिमा निर्वाचित बानियाँ काँग्रेस सभापति शेरबहादुर देउवा र नेता कृष्णप्रसाद सिटौला पक्षका उम्मेद्वार हुन भने केसी काँग्रेस वरिष्ठ नेता रामचन्द्र पौडेल समूहका हुन् । उभिएको थियो । पहिलो चरणमा देउवा समूहबाट बानियाँ, पौडेले समूहबाट केसी र सिटौला समूहबाट भीमसेनदास प्रधान प्रतिस्पर्धामा थिए ।
शनिबार भएको पहिलो चरणको चुनावको मत परिणाम अनुसार प्रधान तेस्रो भएका थिए । पहिलो चरणको निर्वाचनमा उम्मेद्वार मध्य तीनै जनाको ५१ प्रतिशत नकटेपछि दोस्रो चरणको निर्वाचन भएको हो । प्रधानले पहिलो चरणमा सबैभन्दा बढी मत ल्याएका बानियाँलाई साथ दिएका थिए ।
बागमती प्रदेश काँग्रेस संसदीय दलका नेता समेत रहेका बानियाँ मकवानपुर जिल्ला सभापति छन् । यसअघि देउवा नेतृत्वको सरकारमा बानियाँले गृह राज्यमन्त्रीको जिम्मेवारी समेत सम्हालेका थिए ।
सभापति सहित प्रदेश कार्यसमितिको निर्वाचन सँगै भएको भएपनि कार्यसमितिको मतनणा भएको छैन् । प्रदेश पदाधिकारी र सदस्यको मतगनणा सोमबार विहानबाट हुने बताइएको छ ।
