रामेछाप– रामेछापको उमाकुण्ड गाउँपालिका वडा नं १ गुम्देलमा आगलागी हुँदा एक घर जलेर नष्ट भएको छ । सोमबार विहान करिव ११ बजेको समयमा आगलागी हुँदा स्थानीय योग प्रसाद घिमिरे (कृष्ण) को घर जलेर नष्ट भएको हो ।
घर छोडेर मेलापातमा गएको समयमा आगो लागेर आफूहरु बस्दै आएको घर पुर्ण रुपमा जलेर नष्ट भएको घरधनी घिमिरेले बताए । उनले हाम्रो प्रहार डटकमसँग कुरा गर्दै भने– ‘हामी विहान खाना खाएर घाँस काट्ने मेलामा गएका थियौँ । करिव ११ बजेको समयमा भान्साकोठा नजिकै रहेको अर्को घरमा धुँवा आएको स्थानीयले देख्नुभएछ, त्यसपछि हामीलाई खबर आउँदा नआउँदा घरको चारैतिर आगो फैलिसकेछ । घर परिवारका सदस्य र गाउँका सबै मानिसहरु जम्म हुँदा हुँदै आगो झन धेरै बल्न थाल्यो । गाउँलेहरुको सहयोगमा आगो नियन्त्रणमा आएपनि घर भित्र भएको कुनै पनि बस्तु झिक्न पाइएन् । घर सहित घरभित्र भएका सबै सामाग्री जलेर नष्ट भए ।’
घरधनी घिमिरेका अनुसार घर भित्र भएको पाँच लाख भन्दा बढी नगद, साँढे तीन तोला सुन, तामा, काँसो, कपडा, खाद्यन्न लागयतका सामाग्री जलेर नष्ट हुँदा करिव आधा करोड भन्दा बढीको क्षति भएको छ ।
आगलागी भएको घर भूकम्प प्रतिरोधात्मक भएको र राती सुत्ने तथा विभिन्न सामाग्री भण्डारण गर्नको लागि मात्रै प्रयोग गरिएको घरधनी घिमिरेले बताए । उक्त घरमा हाल सम्म आगो नबालेको र कुनै आगो जन्य बस्तु समेत नराखिएको बताउँदै घिमिरेले कसरी आगो लागेको भन्ने विषयमा आफू जानकार नभएको बताए ।
आगलागीको बारेमा जानकारी प्राप्त हुन साथ आफू घटनास्थलमा पुगेर त्यहाँको बस्तुस्तिथि बुझेर तत्कालको लागि आवश्यक पर्ने पाल लगायतका सामाग्री पठाइएको वडाध्यक्ष नोर्वु शेर्पाले बताए ।
आफ्नो प्रतिकृया दिनुहोस्