रामेछाप– मन्थली नगरपालिकाका नगर प्रमुख रमेश कुमार बस्नेतले आफैले आफैलाई ठग्ने प्रवृत्तिले गर्दा युवाहरु विदेशिनु परेको बताएका छन् । मन्थली नगरपालिकाद्वारा आयोजित सुरक्षित बैदेशिक रोजगारीका लागि पत्रकारहरुको भूमिका विषयक अन्तरक्रिया कार्यक्रममा बोल्दै नगर प्रमुख बस्नेतले स्थानीय सरकार र विभिन्न निकायले वेरोजगार युवाहरुलाई लक्षित गरेर ल्याएका कार्यक्रमबाट दीगो रुपको व्यावसाय गर्छु भन्ने सोच नभई क्षणिक समयका लागि अनुदान लिनको लागि मात्रै लागेकाले युवाहरु विदेशिनु परेको बताएका हुन् ।
युवाहरु विदेशिनुको कारण बताउँदै नगर प्रमुख बस्नेतले भने– ‘हाम्रो नगरमा बेरोजगार युवा लक्षित कार्यक्रमहरु धेरै ल्याएका छौँ । तर लक्षित वर्गलाई ल्याइएको कार्यक्रममा लक्षित वर्गले नै अनुदान लिनको लागि मात्रै प्रयोग गरे । जसले गर्दा आफ्नै गाउँमा भएको अवसरलाई छोडेर युवाहरु बैदेशिक रोजगारीमा जान बाध्य भएका छन् ।’
विदेश गएर कमाउने पैसा नेपालमै कमाउने धेरै अवसर हुँदा–हुँदै पनि आफ्नो देशमा आफूसँग भएको सीपको प्रयोग गरेर श्रम नगर्ने प्रवृत्तिले पनि गाउँघरमा युवाहरु नभेटिने अवस्था रहेको नगर प्रमुख बस्नेतको भनाई रहेको छ ।
वैदेशिक रोजगारीबाट फर्केका व्यक्तिहरुले आफूसँग भएको सीपको प्रयोग गरेर नगर भित्र विभिन्न व्यावसाय गर्दै आएकाले त्यस्ता व्यक्तिहरुलाई नगरपालिकाले सहयोग गर्दै आएको बताउँदै नगर प्रमुख बस्नेतले विदेश जान लागेका युवाहरुले पनि त्यस्ता व्यावसायिबाट सिकेर आफ्नै गाउँमा रोजगारी गर्नु पर्नेमा जोड दिए ।
नगर भित्र वैदेशिक रोजगारीको अवस्था कस्तो छ ?, बैदेशिक रोजगारीलाई कसरी सुरक्षित बनाउन सकिन्छ ?, विदेशबाट फर्केका व्यक्तिहरुको सीपलाई प्रयोग गरेर नगपालिकामा भएको बेरोजगारीलाई कसरी कम गर्न सकिन्छ लगायतका विषय बस्तु समेटिएको बैदेशिक रोजगार सम्बन्धी छुट्टै नगर प्रोफाइल तयार भइरहेकाले आगामी दिनमा त्यसै प्रोफाइललाई आधर मानेर वैदेशिक रोजगारी सम्बन्धी काम गरिने नगर प्रमुख बस्नेतले बताए ।
स्वीस सरकारको आर्थिक सहयोगमा २०७१ साल देखि संचालन भएको सुरक्षित आप्रवासन परियोजना (सामी) २०७५ साल देखि रामेछापका ४ स्थानीय तह (मन्थली नगरपालिका, उमाकुण्ड गाउँपालिका, दोरम्बा गाउँपालिका र सुनापति गाउँपालिका) ले संचालन गर्दै आएका छन् ।
रामेछाप जिल्लाबाट श्रम स्वीकृत लिएर बैदेशिक रोजगारीमा जानेको संख्या ४४ हजार भन्दा बढी रहेको छ ।
