रामेछाप– मन्थली नगरपालिका वडा नं ८ चिसापानीमा विभिन्न पार्टी परित्याग गरी एक दर्जन बढी स्थानीयहरु नेपाली काँग्रेसमा प्रवेश गरेका छन् । मंगलबार नेपाली काँग्रेस मन्थली–८ वडाले आयोजना गरेको शुभकामना आदन प्रदान तथा पार्टी प्रवेश कार्यक्रममा नेकपा एमाले र नेकपा माओवादी केन्द्र परित्याग गरी काँग्रेसमा प्रवेश गरेका हुन् ।
नेपाली काँग्रेस मन्थली नगरपालिका वडा नं ८ का वडा सभापति ओमप्रकाश पुरीको अध्यक्षता एवं नेपाली काँग्रेस रामेछापका जिल्ला सचिव दीपक खड्काको प्रमुख आतिथ्यतामा भएको कार्यक्रममा नवप्रवेशीहरुले लामो समय देखि कम्युनिष्ट पार्टीमा रहेर अहिले सम्म केही पनि परिवर्तन नआएको र कम्युनिष्ट पार्टीले जनतालाई दुख दिने काम मात्रै गरेकाले आफूहरु काँग्रेसमा प्रवेश गरेको बताएका छन् ।
कार्यक्रममा नेपाली काँग्रेस रामेछापका सचिव दीपक खड्काले नव प्रवेशीलाई काँग्रेसमा स्वागत गर्दै रिसले पार्टी छोड्नु र विचारले पार्टी छोड्नु धेरै फरक भएकाले काँग्रेसमा आउँदा विचारलाई आत्मसात गरेर आउन आग्रह गरे । सचिव खड्काले कम्युनिष्टहरुको चरित्र भोट हाल्नेको मात्रै काम गरिदिने भोट नहाल्नेको कुरै नसुन्ने भएकाले जुनसुकै पार्टीमा आस्था नेता तथा कार्यकर्तालाई जस्तोसुकै अफ्टेरो पर्दा काँग्रेसलाई सम्झिन आग्रह गरेका छन् । रामेछापका गाउँ–गाउँमा गुड्ने एम्बुलेन्स र शव बहानहरु काँग्रेस नेता कान्छाराम तामाङ र भरत चौलागाईको सहयोगमा गुडेर विरामीको उद्धार गर्दा जनताको भोटबाट जितेका कम्युनिष्ट नेताहरु एम्बुलेन्स र शव बहानको विरोध गर्दै हिड्ने गरेको बताउँदै खड्काले कम्युनिष्ट सरकारबाट कुनै विकास नहुने भएकाले अबको चुनावमा काँग्रेसलाई जिताउन आग्रह गरे ।
यस अघिको स्थानीय तहको निर्वाचनमा चिसापानीमा नेकपा एमालेले जितेको र जनताको जनचाहाना अनुसार कुनै पनि काम नभएकाले आगामी स्थानीय तहको निर्वाचनमा काँग्रेलाई जिताउने गरी काँग्रेस अगाडि बढेको वडा सभापति ओमप्रकाश पुरीको भनाई रहेको छ ।
