रामेछाप– नेपाली कांग्रेस रामेछापका सचिव दिपक खड्काले आफ्नो कार्यकालमा गरिने कामको परिणाममा युवाको अनुभुति दिलाउने बताएका छन् । नेपाली काँग्रेस गोकुलगंगा गाउँपालिका–५ नामाडीले आइतबार आयोजना गरेको दशै तिहारको शुभकामना आदन प्रदान कार्यक्रममा बोल्दै नवनिर्वाचित सचिव खड्काले आफ्नो कार्यकालमा उमेरले युवा नभई काम र परिणामले युवाको अनुभुति दिलाउने बताएका हुन् ।
सचिव खड्काले आफ्नो भनाई राख्दै भने– ‘अहिले म उमेरले युवा अवस्थामै छु । उमेरले मात्रै युवा भएर हुँदैन मैले गर्ने काममा युवाको अनुभुति झल्किनु प¥यो त्यसको लागि मैले आफूसँग भएको युवा जोस र जाँगरलाई पार्टीको काममा खर्च गर्छु । १४ औँ अधिवेशनमा रामेछाप काँग्रेसमा धेरै युवाहरुले विभिन्न जिम्मेवारीका साथ पार्टीमा सहभागिता देखाएका छन् । त्यो सभागिताले पनि पार्टीमा युवाको आवश्यकता रहेको पुष्टि गरेको छ । अबको पाँच वर्षे कार्यकालमा उमेरले युवा हैन कामले युवाको अनुभुति गराउने प्रयास गर्नेछु ।’
स्थानीयत तहको निर्वाचन हुने समय नजिक आइसकेकाले यस अघि काँग्रेसले जितेका पालिका र वडा सहित विभिन्न कारणले पराजित हुनु परेको पालिका र वडामा काँग्रेसलाई जिताउने अभियानमा सिंगो पार्टी जुट्ने पनि खड्काले बताए ।
गोकुलगंगा गाउँपालिका–५ नामाडीका वडा सभापति भरत बहादुर खड्काको अध्यक्षतामा भएको कार्यक्रममा कार्यक्रमका प्रमुख अतिथि समेत रहेका खड्काले सबै कांग्रेसीजनमा दुर्गामाताले एकताको शक्ती दिने विश्वास ब्यक्त गरे । नेपाली कांग्रेस रामेछाप प्रदेश सभा (क) का सचिब कुलराज सुनुवार, नेपाली काँग्रेस गोकुलगंगा गाउँपालिकाका सचिब कैलाश सुनुवार र सह सचिब सुमन खड्का लगायतले आ–आफ्नो धारणा राख्दै पार्टीमा आफ्नो जिम्मेवारी अनुसारको कामलाई प्राथमिकतामा राखेर काम गर्ने प्रतिबद्धता जनाएका छन् ।
कार्यक्रममा नामाडीबाट निर्वाचित जिल्ला सचिव, प्रदेश सभा सचिव, गोकुलगंगा गाउँपालिकाको सचिव लगायतलाई वडा कार्यसमितिले बधाई ज्ञापन गर्दै सम्मान गरेको छ ।
कार्यक्रममा नेपाली काँग्रेसका नेता तथा कार्यकताले एक आपसमा दशै तथा तिहारको शुभकामना आदन प्रदान गरेका थिए ।
