रामेछाप– नेपाली काँग्रेसका नेता एवं महासमिति सदस्य पुर्णबहादुर तामाङ कान्छारामले रामेछापको जिल्ला सभापतिमा आफ्नो उम्मेद्वारी कायमै रहेकाले उम्मेद्वारी छोड्ने र अन्य समूहसँग मिल्न लागेको भन्ने हल्ला मात्रै भएको बताएका छन् । केही दिन अघिदेखि पार्टी सभापतिका सम्भावित उम्मेद्वारहरुको समूहले कान्छारामले उम्मेद्वारी फिर्ता लिएर आफ्नो समूहमा मिल्छ भन्दै गलत हल्ला फैलाएर मतदातालाई आफ्नो समूहमा तान्ने प्रयास भइरहेकाले उम्मेद्वारी फिर्ता लिने र अन्य समूहसँग मिल्ने भन्ने कुरा हल्ला मात्रै भएको बताएका हुन् ।
हाम्रो प्रहार डटकमसँग कुरा गर्दै तामाङले भने– ‘मैले एक वर्ष अघिदेखि नै १४ औँ महाधिवेशनमा रामेछाप काँग्रेसको जिल्ला सभापतिमा आफ्नो उम्मेद्वारी रहने बताउँदै आएको छु र अहिले पनि म सभापतिकै उम्मेद्वार हो । तर, पार्टी सभापतिका उम्मेद्वार लवश्री न्यौपाने र कृष्ण महतको समूह लगायतका मानिसहरुले कान्छारामले उम्मेद्वारी फिर्ता लिन्छ, अन्तिममा हामीलाई सघाउँछ, उसले जित्दैन भन्ने जस्ता भ्रामक हल्लाहरु फैलाएर मतदाताहरु आफ्नो पक्षमा तान्ने प्रयास गरीरहेका छन् । यो एकदम गलत हो । यस्ता भ्रम छर्ने काम बन्द गरौँ । केही क्षणको लागि आफ्नो स्वर्थमा गरिने यस्तो भ्रमको खेतीले भविष्य सम्म असर पार्छ । त्यसैले यस्तो हल्ला नफैलाउन म सबै साथीहरुलाई अनुरोध गर्छु । साथै यस्ता हल्लाको पछि नलाग्न आम मतादाता क्षेत्रिय प्रतिनिधिहरुलाई पनि अनुरोध गर्छु ।’
पार्टी संगठनलाई बलियो बनाउने, स्थानीय तह, प्रदेश सभा र प्रतिनिधिसभामा काँग्रेसलाई जिताउनको लागि आफ्नो उम्मेद्वारी रहेको कान्छाराम तामाङले बताउँदै आएका छन् ।
जिल्ला सभापतिको पदमा वर्तमान पार्टी सभापति लवश्री न्यौपनेले १४ औँ अधिवेशनमा पनि आफ्नो उम्मेद्वरी रहने घोषणा गरीसकेका छन् । त्यस्तै १३ औँ अधिवेशनका सभापतिका प्रत्याशी कृष्ण महतको पनि १४ औँ अधिवेशनमा सभापतिमा उम्मेद्वारी रहने चर्चा रहेको छ ।
रामेछाप काँग्रेसका ६४ ओटा वडामा वडा अधिवेशन सम्पन्न भइसकेको छ भने गाउँपालिका, नगरपालिका, प्रदेशसभा क्षेत्र र जिल्ला अधिवेशन हुन बाँकी रहेको छ ।
