रामेछाप– रामेछापको विभिन्न ठाउँमा गएको एक महिन देखि सुरु भएको चोरीको घटना अझै रोकिएको छैन् । साउन महिनको १४ गते गोकुलगंगा गाउँपालिका वडा नं ४ बेतेलीको सहकारीबाट सुरु भएको श्रृंखलाबद्ध चोरीको घटना एक महिन पछि फेरि मन्थली नगरपालिका वडा नं ५ सुनारपानीमा आइपुगेको छ ।
बेतालीको सहकारीमा चोरी भएको एक महिन पुगेकै राती मन्थली नगरपालिका वडा नं ५ सुनारपानीमा तीन पसल र दुई व्यक्तिको घरमा चोरी भएको छ । सदरमुकाम मन्थलीबाट समेत नजिकै रहेको सुनारपानीमा आइतबार राती तीन पसल र दुई व्यक्तिको घर फोडेर दुई लाख भन्दा बढी नगद सहित चोरी भएको प्रहरीले जानकारी दिएको छ ।
सुनारपानीमा रहेको अनुप स्टोर्सको पछाडि पट्टीको झ्याल फोडेर घर्रामा भएको नगद दुई लाख चोरी भएको अनुप स्टोर्सका संचालक राजेन्द्र कार्कीले बताए । संचालक कार्कीले भने– ‘खाद्यन्न स्टोर्स भएको कोठामा पछाडि पट्टी दुईओटा झ्याल थिए । दुई ओटै झ्याल फोडेर भित्र पसेर घर्रामा भएको सबै पैसा लगेछन् । हामी राती दश बजे सुत्यौँ, सबै निदाएको मौका छोपेर नगद लगिएछ । हामीलाई त पैसा चोरी भएको कुरा सोमबार विहान मात्रै थाहा भयो ।’ कार्कीका अनुसार खाद्यन्नको पसल भएको माथिल्लो तलामा उनिहरुको परिवार बस्ने गरेका थिए ।
त्यस्तै चोरी भएको अनुप स्टोर्सबाट करिव ३ किलोमिटरको दूरीमा रहेको अर्को सुगम किराना पसलमा पनि ढोका फोडेर भित्र पसी सोकेस फुटाएर त्यहाँ भित्र भएको दश हजार नगद सहित महत्वपूर्ण कागजपत्र समेत लगेको संचालक सुमन कार्कीले बताए । राती दश बजे सम्म पसलमा कुनै घटना नभएको बताउँदै संचालक कार्कीले घरका सबै मानिस सुतेको मौका छोपेर सबै पसलमा एकैपटक चोरी भएको हुन सक्ने दावी गरे ।
राती चोरी भएको घटनाको विवरण स्थानीयले प्रहरीलाई जानकारी गराएपछि घटनास्थल पुगेको प्रहरीले भने दुई किराना पसलमा धेरै क्षति पुर्याउने गरी चोरी गरेको र अर्को एक किराना पसलसँगै दुई व्यक्तिको घरमा धेरै क्षति नभएपनि चोरीको प्रयास भएको बताएको छ ।
साउनको १४ गते देखि श्रृंखलाबद्ध रुपमा भइरहेका चोरीको घटनामा संलग्न व्यक्तिको खोजी भइरहेको बताएपनि जिल्ला प्रहरी कार्यालयले चोरीमा संलग्न व्यक्तिहरुको पहिचान गर्न सकेको छैन् ।
यस अघि साउन १४ गते गोकुलगंगा गाउँपालिका वडा नं ४ मा रहेको बेताली सहकारी, साउन १५ गोकुलगंगा–१ चुचुरेमा रहेको गर्जाङ सहकारी, भदौ २ गते गोकुलगंगा–३ रस्नालमा दुई विद्यालय सहित व्यक्तिको व्यवसायिक उद्योग र पसल र भदौ गते गोकुलगंगा–६ फर्पुमा दुई विद्यालयसँगै एक व्यक्तिको कोठा फोडेर चोरी भएको थियो ।
साउन १४ गते देखि भदौ १३ गते राती सम्म विभिन्न ठाउँमा भएका चोरीका घटना एकै प्रकृतिका भएकाले चोरीमा संलग्न एउटै समूह हुन सक्ने पीडितहरुले बताउँदै आएका छन् ।
