रामेछाप– १८ महिनमा सम्पन्न गर्ने गरी २०७३ सालमा निर्माण सुरु गरिएको जिल्ला निर्वाचन कार्यालय रामेछापको भवन ५ वर्ष पछि बल्ल बनेको छ । २०७४ साल साउन महिनको अन्तिम सम्ममा सम्पन्न गर्ने गरि धुलिखेल–ब्रमायणी– कामख्या जे.भी. कम्पनीले जिम्मा लिएको काम निर्माण कम्पनीको लापरबाहीका कारण १८ महिनमा बन्नु पर्ने भवन ५ वर्ष पछि बनेको हो ।
पाँच वर्षपछि निर्माण कार्य सम्पन्न भएको निर्वाचन कार्यालयको भवन प्रमुख निर्वाचन आयुक्तले शुक्रबार उद्घाटन गरेका छन् । उद्घाटन कार्यक्रममा बोल्दै निर्वाचन आयुक्तले नयाँ बनेको कार्यालयबाट निर्वाचनका हरेक कामहरुलाई सहज रुपमा सम्पन्न गर्न सजिलो हुने धारणा राखे । निर्वाचन आयोगको प्रमुख काम नै आम मतदाताहरुलाई सतप्रतिशत मतदानमा सहभागी गराउनु रहेको बताउँदै मतदाता नामावलीमा नाम लेखाउन उमेर पुगेका नागरिकलाई आफ्नो नाम दर्ता गराउन आग्रह गर्दै सरोकारवाला निकायहरु सबै लाग्नु पर्नेमा जोड दिए ।
आयुक्त थपलियाले देशमा राष्ट्रियसभा, स्थानीय तह, प्रदेशसभा र प्रतिनिधिसभाको निर्वाचनलाई लक्षित गरेर आयोगले काम सुरु गरिसकेको बताए । उनले केही वर्षयता देखि नेपालमा निर्वाचन महँगो हुँदै गएको भन्ने गुनासोलाई अन्त्य गर्न सामाजिक सचेतना चलाउनु पर्ने बताए । निर्वाचन खर्चलाई न्यूनिकरण गर्न राजनीतिक र सामाजिक सचेतना नभए जतिसुकै कडा कानून ल्याएपनि त्यसले नियन्त्रण गर्न नसकिने उनको भनाई रहेको छ ।
१ करोड ८२ लाखको लागतमा १८ महिनमा नै निर्माण सम्पन्न गर्ने गरी सम्झौता गरिएको भएपनि निर्माण कम्पनीले ढिलासुस्ती गर्दा ५ वर्ष देखि भाडामा बस्दा आयोगलाई लाखौ घाटा लागेको जिल्ला निर्वाचन कार्यालय रामेछापका प्रमुख शम्भु कटुवालले बताए ।
