कवि थापा, सिन्धुली– सिन्धुलीको गोलन्जोर गाउँपालिका वडा नं ७ खुर्कोटमा युवाहरुले सामुहिक रुपमा बाख्रा पालन सुरु गरेका छन् । वैदेशिक रोजगारीबाट फर्केका तीन जना युवा र गाउँमै विभिन्न व्यवसाय आएका ५ जना युवा गरी ८ जनाको समूहले व्यवसायिक रुपमा बाख्रा पालन सुरु गरेका हुन् ।
खुर्कोट कृषि तथा पशुपन्छी फार्म दर्ता गरेर एक वर्ष देखि बाख्रा पालनमा लागेका युवाहरुले अहिले विभिन्न जातका बाख्रा पालन गरीरहेका छन् । फार्ममा अहिले करिव ३ सयको हाराहारीमा बाख्रा रहेको फार्मका संचालका समितिका अध्यक्ष डोर विक्रम कार्कीले बताए । सामुहिक लगानीमा आफ्नै गाउँमा दुख गरे त्यसले राम्रै आम्दानी दिने र आर्थिक रुपमा समेत मजबुद बन्ने उद्देश्यले एक वर्ष अघि देखि सुरु गरिएको व्यवसाय अहिले राम्रो हुँदै गएको अध्यक्ष कार्कीले बताए ।
केही वर्ष अघि वैदेशिक रोजगारीमा गएर फर्केका फार्मका कोषाध्यक्ष समेत रहेका अर्का संचालक महेश माझीले आफू १५ महिना मलेशिया बस्दा पैसा कमाउनुको साटो उल्टै ऋण लागेर फर्किनु परेको तितो अनुभव सुनाउँदै विदेशमा गर्ने दुख नेपालमा ग¥यो भने त्यसले केही वर्षमै सोचे भन्दा राम्रो आम्दानी दिने बताए ।
समूहमा काम गर्दा आवश्यक अनुसारको लगानी जुटाउन सहज हुने र व्यवसायिक पनि हुने भएकाले ८ जनाको समूह मिलेर फार्म संचालन गरिएको उनिहरुको भनाई रहेको छ । खुर्कोटको डाडाकटेरीमा बनेको फर्मममा हाल ३ सयको हाराहारीमा बाख्रा राख्दा करिव डेढ करोड लगानी भइसकेको र थप लगानी गरेर नजिकै बंगुर फार्म पनि सुरु गर्ने योजना रहेको संचालकहरुले बताएका छन् ।
बाख्रा पालन सुरु गरेको एक वर्षमा फार्मममा उत्पादन भएका खसी–बोका, पाठा–पाठी र माउ बाख्रा पनि विक्री गर्न सहजै भएको र आम्दानी पनि हुन थालेको फार्मका अध्यक्ष डोरविक्रम कार्कीले बताए ।
हाल सम्म आफ्नै लगानीमा सुरु गरिएको फार्मममा स्थानीय सरकार, प्रदेश सरकार र संघीय सरकारबाट कुनै पनि सहयो नपाएको बताउँदै आफूहरु जस्ता युवालाई पशुपालनमा थप आकर्षित गराउन सरकारी निकायहरुले सहयोग गरे बाख्रा पालन थप व्यवसायिक हुने उनिहरुको तर्क रहेको छ ।
