रामेछाप– रामेछाप नगरपालिकाले नगर भित्रका महिलाहरुलाई ड्राइभिङ (हलुका सवारी चालक) तालिम सिकाउने भएको छ । चालु आर्थिक वर्षमा नगरका २० जना महिलालाई सहभागी गराउने गरी १५ दिन सम्मको ड्राइभिङ (हलुका सवारी चालक) तालिम सिकाउन लागेको हो ।
विशेष गरी आर्थिक रुपमा कमजोर भएका एकल महिलालाई प्राथमिकतामा राखेर उनिहरुलाई आत्मनिर्भर बनाउने गरी ड्राइभिङ तालिम संचालन गर्न लागिएको रामेछाप नगरपालिकाका उपप्रमुख सृजना खड्काले बताइन् । सबै वडाबाट महिलाहरुले सीप सिक्नको लागि पाउने भएपनि समाजमा एकल महिला भएकै कारण हरेक दृष्टकोणबाट पछाडि पारिएका एकल महिलालाई बढी प्राथमिकता दिइने उपप्रमुख खड्काको भनाई रहेको छ । उपप्रमुख खड्काले सीप सिक्नको लागि मात्रै नभएर भविष्यमा समेत आफूले सिकेको सीपलाई पेशामा परिणत गर्न सक्छु भन्ने दृढ विश्वास लिएर तालिममा भाग लिन नगरका महिलाहरुलाई आग्रह गरिन् ।
१५ दिने ड्राइभिङ तालिममा सहभागी हुनको लागि नगरपालिकाले एउटा मापदण्ड बनाएर छनौट गर्ने बताइएको छ ।
