रामेछाप– नेपाल आदिवासी जनजाति पत्रकार महासंघ जिल्ला शाखा (फोनिज) रामेछापले पत्रकार युवराज श्रेष्ठलाई पुरस्कार सहित सम्मान गरेको छ । फोनिज रामेछापले गत वर्ष स्थापना गरेको ‘उत्कृष्ट आदिवासी जनजाती वर्ष पुरस्कार’ बाट यो वर्ष पाँच हजार नगद पुरस्कार सहित सम्मान गरेको हो ।
फोनिजको २२ औँ स्थापना दिवसको अवसरमा बुधबार खाँडादेवी गाउँपालिकामा एक कार्यक्रमको आयोजना गरी फोनिज बागमती प्रदेशका उपाध्यक्ष समेत रहेका पत्रकार श्रेष्ठलाई खाँडादेवी गाउँपालिकाका अध्यक्ष प्रेमबहादुर तामाङ, उपाध्यक्ष मखमली श्रेष्ठ, पत्रकार महासंघ रामेछापका अध्यक्ष बद्री नयाँघरेले संयुक्त रुपमा नगद पुरस्कारको साथमा दोसल्ला ओढाएर सम्मान गरेका छन् ।
पत्रकारिताको माध्यमबाट जनजाती समुदायको उत्थान एवं समाज रुपान्तरणमा महत्वपूर्ण योगदान पुर्याएको मूल्यांकन गर्दै श्रेष्ठलाई ‘उत्कृष्ट आदिवासी जनजाती वर्ष पुरस्कार–२०७८’ प्रदान गरिएको आयोजक संस्थाले बताएको छ ।
सम्मान कार्यक्रममा बोल्दै खाँडादेवी गाउँपालिकाका अध्यक्ष प्रेम तामाङले समाज परिवर्तनको लागि पत्रकारहरुले खोजमूलक सामाग्रीलाई बढी प्राथमिकता दिनु पर्नेमा जोड दिए । गाउँपालिका उपाध्यक्ष मखमली श्रेष्ठले पत्रकारहरुले समाजमा भएका हरेक कुरालाई विश्लेषण गरेर मात्र समाचार लेख्दा नागरिकहरु सुसूचित हुने र पत्रकारप्रति आम पाठकको विश्वास बढ्ने बताइन् । त्यस्तै कार्यक्रममा बोल्दै नेपाल पत्रकार महासंघ रामेछापका अध्यक्ष बद्री नयाँघरेले फोनिजले प्रत्येक वर्ष एक जना पत्रकारलाई प्रदान गर्ने उत्कृष्ट आदिवासी जनजाति पत्रकारिता वर्ष पुरस्कारले पत्रकारहरुलाई क्रियासिल र आफ्नो पेशा प्रति जिम्मेवार बनाउने धारणा राखे ।
फोनिज रामेछापका अध्यक्ष नवराज श्रेष्ठको अध्यक्षतामा भएको कार्यक्रममा नेपाल पत्रकार महासंघ बागमती प्रदेश सदस्य ज्ञानु श्रेष्ठ, प्रेस चौतारी नेपल रामेछापका अध्यक्ष युनिक विफा घिसिङ, प्रेस सेन्टर रामेछापका संयोजक निरोज श्रेष्ठ, राष्ट्रिय दलित पत्रकार महासंघ नेपाल रामेछापका अध्यक्ष लेख बहादुर विक लगायतका पत्रकारहरुको सहभागिता रहेको थियो ।
पत्रकार सुमित श्रेष्ठको सहयोगमा अघिल्लो वर्ष स्थापना भएको अक्षयकोष मार्फत प्रत्येक वर्ष एक जना आदिवासी जनजाति पत्रकारलाई उत्कृष्ट आदिवासी जनजाति पत्रकारिता वर्ष पुरस्कार प्रदान गर्दै आएको छ ।
यस वर्ष पुरस्कृत हुने पत्रकार श्रेष्ठलाई श्रेष्ठ विगत १५ वर्ष देखी पत्रकारीता पेशामै क्रियासील छन् । हाल श्रेष्ठ पत्रकार महासंघ रामेछाप शाखाका कोषाध्यक्ष रहेका छन् भने न्युज २४ टेलिभिजनका जिल्ला सम्बाददाता, झंकार एफ एम ९७.५ मेगाहर्ज स्टेशन म्यानेजर र मेरोप्रदेश डट.कमका प्रबन्ध निर्देशक समेत हुन् ।
आफ्नो प्रतिकृया दिनुहोस्