रामेछाप– मन्थली नगर क्षेत्रभित्रबाट यस वर्ष एसईईमा उच्चत्तम जिपिए ल्याउने १६ जना विद्यार्थीले +२ को विज्ञान विषयमा छात्रवृत्तीमा पढ्न पाउने भएका छन् । मन्थली नगरपालिकाले नगरक्षत्रभित्रका सबै वडाबाट एक–एक जना र नगरको सिफारिसमा २ जना गरी १६ जनालाई छात्रवृत्तीमा पढाउने भएको हो ।
नगरभित्रका विद्यार्थीले एसइइमा राम्रो अंक ल्याउन सफल भएपनि आफ्नो आर्थिक अवस्था कमजोर लगायतका कारणले नगरभित्रै विज्ञान विषय पढ्न पाउने सुविधा हुँदा हुँदै उक्त विषय पढ्नबाट बञ्चित हुँदै गएपछि थोरै भएपनि विद्यार्थीलाई सहयोग पुर्याउने उद्देश्यले अघिल्लो वर्ष देखि सुरु गरिएको छात्रवृत्ती कार्यक्रमलाई यस वर्ष पनि निरन्तरता दिइएको नगर प्रमुख रमेश कुमार बस्नेतले बताए ।
जिल्ला भित्रका विद्यालयहरुलाई विज्ञान विषयको शिक्षक आवश्यक परेर सूचना जारी गर्र्दा कतिय ठाउँमा दरखास्त नै नपर्ने र परेपनि धेरै टाढाका उम्मेद्वारहरुले मात्रै दरखास्त दिँदा दक्ष जनशक्ति पाउनबाट समेत जिल्ला बञ्चित हुन पुगेको बताउँदै नगर प्रमुख बस्नेतले भविष्यमा त्यस्तो समस्यालाई समेत समधान गर्न सक्ने गरी नगरपालिकाले यो कार्यक्रम अगाडि सारेको बताए ।
जिल्लाकै नमूना माविको रुपमा परिचित मन्थली माविमा मात्रै विज्ञान विषय पठानपाठन हुने हुँदा त्यसलाई जोगाउनु नगरपालिकाको दायित्व रहेकाले पनि छात्रावृत्ती योजना अगाडि सारिएको नगर प्रमुख बस्नेतको भनाई रहेको छ ।
नगरपालिकाको मंगरबार बसेको ४९औँ कार्यपालिकाको बैठकले समेत उक्त कार्यक्रमलाई अगाडि बढाउने निर्णय गरेकाले वडा कार्यालय मार्फत लक्षित समूहलाई जानकारी हुने प्रमुख प्रशासकीय अधिकृत लिलाराज पौडेलले जानकारी दिए ।
आफ्नो प्रतिकृया दिनुहोस्