रामेछाप– नेपाल तेक्वान्दो संघ जिल्ला कार्यसमिति रामेछापले नयाँ कार्या समिति पाएको छ । जिल्ला कार्यसमिति रामेछापको वार्षिक साधारण सभा तथा तेस्रो अधिवेशनले केदार कार्कीको अध्यक्षतामा १५ सदस्यीय नयाँ कार्यसमिति चयन गरेको हो ।
नेपाल तेक्वान्दो संघ जिल्ला कार्यसमिति रामेछापका अध्यक्ष प्रदिप कुमार श्रेष्ठको अध्यक्षतामा भएको साधारणसभा अधिवेशनले निर्विरोध नयाँ कार्यसमिति चयन गरेको हो । नयाँ कार्यसमितिको उपाध्यक्षमा टिकाराम राना मगर, सचिवमा देवेन्द्र श्रेष्ठ, कोषाध्यक्षमा घना श्रेष्ठ, सहसचिवमा अपना कुमारी श्रेष्ठ चयन भएका छन् । त्यसैगरी सदस्यहरुमा क्रमशः रुद्र कुमार जेसपुचा, बिजय तामाङ, निङबर पाख्रिन र रुकुम हायु रहेका छन् ।
१५ जनाको कार्यसमिति बनेको भएपनि अहिले ९ जना मात्रै निर्विरोध निर्वाचित भएको र बाँकी पदाधिकारी सहित सदस्य संघको बिधान अनुसार कार्यसमितिको बैठले मनोनित गर्न पाउने भएकाले केही समय भित्रै बैठक बसेर कार्यसमितिलाई पूर्णता दिइने नवनिर्वाचित अध्यक्ष कार्की बताए ।
जिल्लाको कार्यसमिति पूर्ण रुपमा विस्तार भएपछि जिल्लाका सबै स्थानीय तहरुमा तेक्वान्दो संघ गठन गर्ने, तेक्वान्दो खेल र खेलाडीलाई हौसला बढाउने खालका विभिन्न कार्यक्रमहरु आफ्नो कार्यकालमा गरिने अध्यक्ष कार्कीले बताए ।
नयाँ बनेको समितिले जिल्लामा करिव ४ सयको हारहारीमा रहेका तेक्वान्दो खेलाडीलाई समेट्दै नयाँ कार्यक्रमका साथ अगाडि बढ्ने गरी संघ लाग्ने निर्वाचित सचिव देवेन्द्र श्रेष्ठले बताए । नयाँ कार्यसमितिले अब आफ्नै कार्यालयबाट कामकाज अगाडि बढाउने गरी रामेछाप बजारमा संघको कार्यालय समेत स्थापना गरिएको सचिव श्रेष्ठले बताए ।
नेपाल तेक्वान्दो संघ जिल्ला कार्यसमिति रामेछापका अध्यक्ष प्रदिप कुमार श्रेष्ठको अध्यक्षता एवं नेपाल तेक्वान्दै संघ बागमती प्रदेशका प्रतिनिधि पासाङ शेर्पाको प्रमुख आतिथ्यतामा सोमबार रामेछाप बजारमा भएको साधारणसभा तथा अधिवेशनमा विभिन्न खेलाडी र खेलप्रेमीहरुको सहभागिता रहेको थियो ।
