श्रीधर घिमिरे– रामेछापमा ट्राफिक कारबाहीमा एक वर्षको अवधीमा झण्डै डेढ करोड राजस्व संकलन भएको छ । आर्थिक वर्ष २०७७/७८ को सुरु देखि असार मसान्त सम्मको अवधिमा १ करोड ४८ लाख ८२ हजार रुपैयाँ राजस्व संकलन भएको जिल्ला ट्राफिक कार्यालय रामेछापले बताएको छ ।
विभिन्न जिल्लाबाट रामेछाप भित्रने, रामेछाप जिल्लाबाट बाह्य जिल्लामा जाने र रामेछाप जिल्ला भित्रै चल्ने सवारीका साधन तथा ढुवानीका साधनलाई ट्राफिक नियम उलंघन गर्दा गरिने कारबाहीबाट उक्त रकम उठेको जिल्ला ट्राफिक कार्यालय रामेछापका प्रमुख विकल भट्टराई बताए । एक महिनाको अवधिमा १५ हजार सवारी र ढुवानीका साधनहरु कारबाहीमा परेको भट्टराईले बताए ।
यात्रु र चालकको सुरक्षाको लागि नियम उलंघन गर्ने ढुवानी तथा सवारीका साधनलाई गरिएको कारबाहीबाट अघिल्ला वर्षको तुलनामा यो वर्ष दुर्घटना निकै कम भएको जिल्ला प्रहरी ट्राफिक प्रमुख भट्टराईले बताए । भट्टराइले भने– ‘जिल्लामा सडक बिस्तार भएसँगै सवारीका साधन र ढुवानीका साधन धेरै चल्न थालेका छन् । त्यसरी चल्ने दुबै साधनमा चालकहरुले लापरवाही गर्दा मानिसको ज्यानै जान सक्ने हुँदा हामीले ट्राफिक नियममा कडाई गरेकै कारण दुर्घटनाहरु पनि कम भएका छन् । त्यस्तै मापासे गरेर सवारी र ढुवानीका साधन चलाउने दर घटेको छ भने चालकहरुमा हाम्रै कारणले दुर्घटना बढी हुने रैछ भन्ने कुराको समेत जानकारी भएर नियम पालना गर्ने सोचको विकास भएको छ । राजस्व धेरै उठ्यो भन्ने भन्दा पनि गल्ती गर्नेले कारवाही भोग्यो भन्ने महत्वपूर्ण कुरा हो । तसर्थ हामी जिल्लाको ट्राफिक व्यस्थापनलाई थप सुरक्षित बनाउने अभियानमा सधै रहेका छौँ ।’
ट्राफिक कारवाहीमा परेका सवारीका साधान र ढुवानीका साधन चलाउने चालकले अहिले नियमलाई पालना गर्नुको साथै लाइसेन्स देखि आवश्यक सबै कागजपत्र बोक्न थालेको ट्राफिक प्रमुख भट्टराईले बताए ।
प्रहार खबर साप्ताहिकमा साउन १० गते आइतबार प्रकाशित
