प्रहार खबर– नेपाल कम्युनिष्ट पार्टीका संस्थापक नेता पुष्पालाल श्रेष्ठको ४३औँ स्मृति दिवसमा उनकै जन्मथलो रामेछापको भंगेरीमा नेकपा एमालेका केपी शर्मा ओली समूह र माधव कुमार नेपाल समूहले एकै स्थानमा छुट्टाछुट्टै कार्यक्रमको आयोजना गरेर श्रेष्ठलाई सम्झेका छन् । श्रेष्ठको जन्मथलो समेत रहेको स्थानमा भएको सालिकमा दुई समूहले छुट्टाछुट्टै कार्यक्रमको आयोजना गरेर श्रद्धान्जलीसभा तथा माल्यार्पण कार्यक्रम गरेर स्मृति दिवस मनाएका हुन् ।
गत वर्ष तत्कालिन नेकपा फुटको संघरमा पुग्दा रामेछापबाट एकताको सन्देश दिने भन्दै दुबै समूहले एकैठाउँमा संयुक्त कार्यक्रम गरेका थिए । तर यस वर्ष भने दुबै समूहले छुट्टाछुट्टै कार्यक्रम गरेका छन् । केपी ओलीले नेतृत्व गरेको नेकपा ऋषी कट्टेलको हो भनेर सर्वोच्च अदालतले फैसला गरेपछि बिउँतिएको एमालेमा पनि माधव कुमार नेपाल र केपी ओलीले एक अर्कालाई दोष दिएर आ–आफ्नो समूह बनाउन थालेपछि त्यसको असर पुष्पलालकै जन्मस्थल रामेछापमा पनि देखिएको छ ।
ओली समूहले जिल्ला अध्यक्ष बनाएको आनन्द कुमार श्रेष्ठ, सचिव पुरुषोत्म कडरिया, केन्द्रिय नेता माधव ढुंगेल, जिल्ला स्तरका नेता सहितको टोली भंगेरी पुगेर नेकपाका संस्थापक महासचिव पुष्पलाललाई सम्झदै उनको योगदानको चर्चा गरेका थिए । ओली समूहले आफू निकट नेता तथा कार्यकर्ताको सहभागितामा कार्यक्रम गरेको भएपनि नेपाल समूहले भने नेकपा माओवादीको समेत सहभागितामा संयुक्त कार्यक्रमको आयोजना गरेको छ । नेपाल समूहका जिल्ला स्तरका नेता देखि पालिका स्तरको नता र नेकपा माओवादी केन्द्रका नेता तथा कार्यकर्ताले संयुक्त रुपमा फुलमाला लगाएर श्रेष्ठको ४३ औँ स्मृति दिवस मनाएका छन् ।
विक्रम संवत १९८१ असार १५ गते रामेछापको भँगेरीमा जन्मिएका पुष्पलालले २००६ साल वैशाख १० गते नेपाल कम्युनिष्ट पार्टीको स्थापना गरेका थिए । श्रेष्ठको २०३५ साल साउन ७ गते भारतमा निधन भएको थियो ।
प्रहार खबर साप्ताहिकमा साउन १० गते आइतबार प्रकाशित
