रामेछाप– प्रधानमन्त्री कृषि आधुनिकीकरण परियोजना, परियोजना कार्यन्वयन इकाई रामेछापद्वारा जुनार जोन कार्यक्रम संचालन भएको रामेछाप–७ सुकाजोरका किसानलाई सुन्तला जातको विरुवा वितरण गरिएको छ । परियोजनामा सूचीकृत ग्रामिण विजनेश प्रमोशन प्रा.लिको आयोजनामा ५० जना किसानलाई उनिहरुको माग अनुसार परियोजनाको पचास प्रतिशत अनुदानमा शुक्रबार विरुवा वितरण गरिएको हो ।
किसानको माग अनुसार सुन्तला, जुनार र कागतीको विरुवासँगै सिंचाइको लागि आवश्यक पर्ने पाइप, प्लास्टिक पोखरी लगायतका सामग्री वितरण गरिएको ग्रामिण विजनेश प्रमोशन प्रा.लिका अध्यक्ष गुञ्ज बहादुर कार्कीले बताए । परियोजनाको चक्लाबन्दी कार्यक्रम अन्तरगत किसानहरुलाई परियोजनाको पचास प्रतिशत अनुदान र किसानको पचास प्रतिशत लागतमा संस्थाको समेत सहयोगमा विरुवा उपलब्ध गराईएको जुनार जोन संचालक समितिका सचिव समेत रहेका कार्कीले बताए ।
अध्यक्ष कार्कीले रामेछापको सुकाजोरमा सुन्तला जातको विरुवाले राम्रो उत्पादन दिने र किसानहरुलाई उपलब्ध गराइएको विरुवालाई राम्रो सँग हुर्काएर व्यवसायिक किसान बन्न सके त्यसले किसानहरुलाई आर्थिक रुपमा ठूलो सहयोग पुग्ने विश्वास व्यक्त गरे ।
पहिलो चरणमा दुई हजार पाँच सय विरुवा वितरण गरिएको र बाँकी एक हजार पाँच सय विरुवा पनि चाडै वितरण गरिने ग्रामिण विजनेश प्रमोशन प्रा.लिका कार्यक्रम संयोजक युवराज सुवेदीले बताए ।
जोनको दश लाख अनुदान, किसान र संस्थाको पचास प्रतिशत लागत गरी करिव २० लाख बराबरको कार्यक्रम रहेको छ ।
आफ्नो प्रतिकृया दिनुहोस्