रामेछाप– नेपाली काँग्रेस चिसापानी–काठमाण्डौ सम्पर्क समितिले मन्थली नगरपालिका वडा नं ८ चिसापानीमा कोरोना संक्रमित भएका व्यक्तिहरुको स्वास्थ्य अवस्था बुझ्न मेडिकल औषधि र आयुर्वेदिक औषधि लिएर घर–घरमै भेट्न पुगेको छ । बस्ती स्तरमै कोरोना फैलिएपछि संक्रमितहरुको स्वास्थ्य अवस्था बुझ्दै उनिहरुलाई आवश्यक पर्ने मेडिकल औषधि र आयुर्वेदिक औषधि लिएर समितिका प्रतिनिधि सहित संक्रमितको घरमै पुगेका हुन् ।
स्वास्थ्यकर्मी, स्थानीय जनप्रतिनिधि, समितिका प्रतिनिधि सहितको टोलीले पछिल्लो पटक संक्रमित भएका ३० जना व्यक्तिहरुलाई कम्तिमा पाँच दिनलाई पुग्ने औषधि दिइएको स्थानीय अनिल कर्माचार्यले जानकारी दिए ।
नेपाली काँग्रेस मन्थली नगरपालिका वडा नं ८ चिसापानी–काठमाण्डौ सम्पर्क समितिको पहलमा कोरोना भाइरससँग जुधिरहेका संक्रमितलाई औषधिको आवश्यक पर्न सक्ने भएकाले कोरोना भाइरस संक्रमितहरुले प्रयोग गर्न मिल्ने करिव ५० हजार बरारबरको औषधि वितरण गरिएको नेपाली काँग्रेस मन्थली नगरपालिका वडा नं ८ चिसापानीका इकाई सभापति ओम पुरीले बताए ।
जिल्लामा कोरोना भाइरसका विरामीहरु बढ्दै गएकाले गाउँ–गाउँमा संक्रमितले प्रयोग गर्ने औषधि अभाव हुन सक्ने भएकाले चिसापानी–काठमाण्डौ सम्पर्क समितिले स्वास्थ्यकर्मीहरुको सिफारिसमा उक्त औषधि खरिद गरेर गाउँमा निःशुल्क वितरण गरिएको समितिका अध्यक्ष मनोज श्रेष्ठले बताए ।
