रामेछाप– रामेछाप उद्योग वाणिज्य संघले अक्सिजन सहितको आइसोलेशन बनाउने भएको छ । संघको सोमबार बसेको कार्यसमितिको बैठकले नेपालमा तिव्र रुपमा फैलिइ रहेको कोरोना भाइसबाट जिल्लाका व्यवसयीहरु पनि संक्रमित हुन सक्ने भएकाले उनिहरुका लागि अक्सिजन सहितको ६ बेडको आइसोलेशन बेड बनाउने निर्णय गरेको हो ।
दोस्रो चरणमा फैलिइरहेको कोरोना भाइरस नियन्त्रणको लागि सरकारले निषेधाज्ञ लगाएको भएपनि उपभोक्ताहरुलाई खाद्यन्न लगायतका सामग्री सहज रुपमा उपलब्ध गराउन अग्र भागमा रहेर खट्ने उद्योगी तथा व्यवसायीहरु संक्रमणको उच्च जोखिममा हुने भएकाले यदि त्यस्ता व्यक्तिहरुलाई कोरोना पुष्टि भई आइसोलेशनमा बस्नु पर्ने संक्रमितहरुका लागि अक्सिजन सहितको आइसोलेशन बेड निर्माण गर्ने निर्णय भएको रामेछाप उद्योग वाणिज्य संघका महासचिव नवराज ढुंगेलले बताए । आइसोलेशनमा बस्ने संक्रमितहरुका लागि अवाश्यक खाना खुउवाने देखि औषधि उपचार सम्मको व्यवस्थापन संघले गर्ने पनि महासचिव ढुंगेलले बताए ।
नेपालको विभिन्न ठाउँमा कोरोना संक्रमित विरामीले अक्सिजन अभावको कारणले ज्यान गुमाउनु पर्ने अवस्था आइरहेको बेला आगामी दिनमा रामेछाप उद्योग वाणिज्य संघमा आवद्ध भएका उद्योगी एवं व्यवसायीहरुले पनि त्यस्तो समस्या भोग्नु पर्ने अवस्था नआओस भन्ने उद्देश्यले आफ्नै भवनमा आइसोलेशन बेड निर्माण गर्न लागिएको रामेछाप उद्योग वाणिज्य संघका अध्यक्ष केशव प्रसाद घिमिरेले बताए । आइसोलेशन संचालनको लागि आवश्यक सामग्री जुटाउन सजिलो हुने भएपनि अक्सिजन जुटाउन निकै अफ्टेरो रहेकाले छिमेकी जिल्लाहरुमा समन्वय भइरहेको अध्यक्ष घिमिरेको भनाई रहेको छ । महामारीको बेला सरकारले जारी गरेका स्वास्थ्य सुरक्षाका मापदण्ड अपनाएर आफ्नो व्यापर व्यवसाय संचालन गर्न पनि अध्यक्ष घिमिरेल आग्रह गरेका छन् ।
रामेछाप जिल्लामा सिटामोल समेत अभाव भएको वेला व्यवसायीहरूको छाता संस्थाले यो विपत तथा महामारी संवेदनशील हुदै नेपाल सरकारलाई समेत सहयोग पुग्ने गरी आइसोलेशन संचालन गर्न लागिएको कार्यकारी अधिकृत नवीन केसीको भनाई रहेको छ ।
रामेछाप जिल्लाभरी रहेर विभिन्न उद्योग तथा व्यवसाय संचालन गर्ने एक हजार ४ सय उद्योगी एवं व्यवसायीहरु रामेछाप उद्योग वाणिज्य संघमा आवद्ध रहेका छन् ।
