रामेछाप– रामेछापको उमाकुण्ड गाउँपालिका वडा नं १ गुम्देलका स्थानीय जनप्रतिनिधि सहित ६ जनामा कोरोना पुष्टि भएपछि उनिहरुको सम्पर्कमा आएका र कोरोनाको लक्ष्यणसँग मिल्दोजुल्दो लक्ष्यण भएकाहरुको कोरोना परीक्षणको लागि ५९ जनाको स्वाब संकलन गरिएको छ । उमाकुण्ड गाउँपालिका उपाध्यक्ष उर्मिला कार्कीको नेतृत्वमा गाउँपालिकाबाट गएको स्वास्थ्यकर्मीहरुको टोलीले उपाध्यक्ष कार्की सहित ५९ जना स्थानीयको पिसिआर परीक्षणको लागि आइतबार स्वाब संकलन गरिएको हो ।
वडा नं १ का जनप्रतिनिधि सहित ६ जनामा कोरोना पुष्टि भएपछि गाउँमा कोरोना फैलिन सक्ने सम्भाना बढ्दै गएकाले कोरोनालाई नियन्त्रण गर्नको लागि गाउँपालिकाले गुम्देल स्वास्थ्य केन्द्रमा आफू सहित ५९ जना स्थानीयको स्वाब संकलन गरी परीक्षणको लागि प्रादेशिक जनस्वास्थ्य प्रयोगशाला धुलिखेल पठाएको उपाध्यक्ष कार्कीले बताइन् । उपाध्यक्ष कार्कीले भनिन्– ‘केहि दिन अघि मात्रै वडा नं १ का वडाध्यक्ष सहित ६ जना व्यक्तिलाई कोरोना पुष्टि भयो । त्यसपछि यहाँ अन्य व्यक्तिहरुलाई समेत कोरोना हुन सक्ने सम्भावनालाई मध्यनजर गर्दै गाउँमै आएर मेरो सहित स्थानीयहरुको स्वाब संकलन गरिएको छ । स्वाब संकलन गरे परीक्षणको लागि स्वास्थ्य कार्यालय रामेछापको समन्वयमा धुलिखेल पठाएको छ ।’
स्वाब संकलन गरिएका सबैलाई रिपोर्ट नआए सम्म एक अर्कासँग सम्पर्कमा नआउन अनुरोध गर्दै घर भित्रै बस्न अनुरोध गरिएको उपाध्यक्ष कार्कीले बताइन् । कोरोना महामारीबाट बच्नको लागि सरकारले जारी गरेका मापदण्ड पुरा गर्न अनुरोध गर्दै केही समय घर भित्रै सुरक्षितसँग बस्न समेत उपाध्यक्ष कार्कीले अनुरोध गरिन् ।
जिल्लाका विभिन्न ठाउँबाट यस अघि पठाइएका धेरै स्वाबको रिपोर्ट आउन बाँकी भएकाले आइतबार गुम्देलबाट संकलन गरी पठाएका स्वाबको रिपोर्ट आउन केही ढिला हुने स्वास्थ्य कार्यालय रामेछापले बताएको छ ।
गुम्देलमा भिडभाड नहुने ठाउँ भएपनि निर्माणाधिन हाइड्रोपावरमा आवत जावत गर्ने मानिसहरु वा केही समय अघि गाउँमा भएको विवाहमा मानिसमा जमघट भएको कारण कोरोना संक्रमण फैलिएको हुन सक्ने श्रोतको दावी छ ।
