रामेछाप– नेपाली काँग्रेस रामेछापका नेता एवं गोकुलगंगा–४ बेतालीका स्थानीय नानीबाबु बस्नेतले आफूसँग भएका अक्सिजन सिलिण्डर कोरोना संक्रमित विरामीका लागि उपचारमा प्रयोग गर्न गाउँपालिकालाई दिएका छन् । नेपाली काँग्रेस जिल्ला कार्यसमितिका आमन्त्रित सदस्य समेत रहेका बस्नेतले आफ्नो विभिन्न उद्योगहरुमा प्रयोगमा रहेका १४ ओटा खाली अक्सिजन सिलिण्डर कोरोना.महामारी भर प्रयोग गरेर फिर्ता गर्ने गरी कोरोना संक्रमितको उपचारमा प्रयोग गर्न गाउँपालिकालाई दिएका हुन् ।
नेता बस्नेतले सिलिण्डर हस्तान्त्ररण गर्दै भने– ‘यतिबेला देश महामारीमा छ, यस्तो बेला पालिकाबासीलाई बचाउनु हामी सबैको दायित्व हो । महामारीमा सबैले कोरोनालाई नियन्त्रणको लागि धेरै थोरै सहयोग गर्नुपर्छ । मैले पनि आफूसँग भएका १४ थान अक्सिजन सिलिण्डर कोरोना संक्रमित विरामीको लागि प्रयोग गर्न दिएको छु । यसले कोरोना नियन्त्रणको लागि थोरै भएपनि सहयोग पुग्ने छ भन्ने विश्वास लिएको छु ।’
अक्सिजन सिलिण्डर सहयोग गर्ने बस्नेत गत स्थानीय तहको निर्वाचनमा नेपाली काँग्रेसको तर्फबाट गोकुलगंगा गाउँपालिकाको अध्यक्षको प्रत्यासी समेत हुन् ।
कोरोना महामारी भरी प्रयोग गर्न दिएको अक्सिजन सिलिण्डर गाउँपालिकाले अक्सिजन भरेर प्रयोगमा ल्याउने गाउँपालिकाका प्रमुख प्रशासकिय अधिकृत इश्वरी प्रसाद सुवेदीले बताए । प्राप्त सिलिण्डरमा अक्सिजन भर्नको लागि विभिन्न निकायहरुसँग समन्वय भइरहेको र अक्सिजन भरेपछि आवश्यक उपकरण सहित गाउँपालिका स्तरिय अस्पतालमा राखिने सुवेदीले बताए ।
गोकुलगंगा गाउँपालिका भरी कोरोनाको दोस्रो लहरमा ३० जनालाई कोरोना संक्रमण भइसकेको छ ।
आफ्नो प्रतिकृया दिनुहोस्