रामेछाप– नवजागरण बचत तथा ऋण सहकारी संस्था लिमिटेड आफ्नै भवनबाट सेवा दिने गरी नयाँ निर्मित भवनमा सरेको छ । आफ्नै लगानीमा निर्माण गरेको अत्याधुनिक सुविधा सम्पन्न भवनबाटै सेवा दिने गरी शानीबर नयाँ भवनमा सरेको हो ।
एक करोड ८१ लाख ७९ हजार ३९ रुपैयाँको लागतमा बनेको नयाँ भवनको उद्घाटन बागमती प्रदेशका आर्थिक मामिला तथा योजना मन्त्री कैलाश प्रसाद ढुंगेलले गरेका छन् । सहकारी भवनको उद्घाटन गर्दै मन्त्री ढुंगेलले नेपालको आर्थिक समृद्धीमा सहकारीको महत्वपूर्ण योगदान रहेको बताउँदै सहकारी बिना देशको अर्थतन्त्र लंगडो हुने धाराण राखे । मन्त्री ढुंगेलले रामेछाप जिल्लामा नवजागरणले अहिलेको प्रविधियुक्त समयानुसार अत्याधुनिक भवनबाट आफ्ना शेयर सदस्यलाई सेवा दिने गरी भवन बनाएर आर्थिक कारोबार सुरु गर्नु सकरात्मक भएकाले यो अभ्यासले सहकारीको आर्थिक पारदर्शितासँगै सहकारी प्रति शेयर सदस्यहरुको विश्वास बढ्दै जाने बताए । प्रदेश सरकारले सहकारीलाई थप व्यवस्थित बनाउने योजना रहेको पनि मन्त्री ढुंगेलले बताए ।
फरक प्रसंगमा मन्त्री ढुंगेलले आफू बागमती प्रदेशको आर्थिक मामिला तथा योजना मन्त्री भएपछि रामेछापमा धेरै विकास भएको दावी गरे । वर्षौ सम्म पनि संभन नहुने ठूला–ठूला सडक आयोजनाहरु आफू मन्त्री भएकै कारण बनाउन सकिएको उनको भनाई रहेको छ ।
बागमती प्रदेश बचत तथा ऋण सहकारी संघका महासचिब जीवशराज खड्काले बागमती प्रदेशमा रहेका सहकारीहरुलाई सरकारले सहयोग नगर्दा सहकारीहरुले भने अनुसारको काम गर्न नसकेको बताए । नेफ्सकुनका केद्रिय सदस्य समेत रहेका खड्काले पछिल्लो समयमा सहकारी संस्थाहरुले आफ्नो उद्देश्य भन्दा बाहिरा रहेर आर्थिक गतिविधि गर्दै गएको बताउँदै त्यसलाई नियन्त्रण गर्न सकेन भने सहकारीमा बिकृति भित्रने चिन्ता व्यक्त गरे ।
कार्यक्रममा रामेछाप जिल्ला बचत तथा ऋण सहकारी संघका अध्यक्ष जगन्नाथ दाहाल, रामेछाप उद्योग वाणिज्य संघका अध्यक्ष केशव प्रसाद घिमिरे, जिल्ला युवा परिषद्का अध्यक्ष प्रकाश कुमार कार्की, मन्थली माविका प्रधानाध्यापक टंक दाहाल, नवजागरण बचतका लेखा सुपरिवेक्षक समितिका संयोजक तारानिधि सुवेदी, शेयर सदस्य राजेश श्रेष्ठ लगायतले आ–आफ्नो भनाई राखेका छन् ।
संस्थाका अध्यक्ष श्याम थापाको अध्यक्षमा भएको कार्यक्रममा संस्था स्थापना देखि हाल सम्म सहकारीले गरेका क्रियाकलपको बारेमा जानकारी समेत गराइएको थियो ।
२०५५ सालमा स्थापना भएको नवजागरण बचत तथा ऋण सहकारी संस्थाले अहिले करिव ५० करोडको हाराहारीमा आर्थिक कारोवार गर्दै आएको छ भने करिव ८ हजार शेयर सदस्यले सहकारीबाट सेवा लिइरहेका छन् ।
