युवराज सुवेदी, रामेछाप– रामेछाप नगरपालिकामा तेस्रो राष्ट्रपति रनिङ शिल्ड प्रतियोगिता सुरु भएको छ । नगर भित्रका म्याध्यमिक विद्यालयका छात्र छात्राहरुले सहभागिता जनाउन पाउने प्रतियोगिता शुक्रबार देखि सुरु भएको हो । तीन दिन सम्म चल्ने प्रतियोगिताको उद्घाटन रामेछाप नगरपालिकाका नगर प्रमुख नर बहादुर थापामगरले गरेका छन् ।
उद्घाटन कार्यक्रममा बोल्दै नगर प्रमुख नर बहादुर थापामगरले आफूहरु निर्वाचित भएर आए देखि नै संचालन गर्दै आएको राष्ट्रपनि रनिङ शिल्ड प्रतियोगिताले विद्यार्थीहरुमा खेलकुद मोह बढ्दै गएको बताए । सबै वडा सहभागि हुन पाउने प्रतियोगिताले नगर भित्र भएका खेलाडीहरुको क्षमता पहिचान हुनुको साथै नगरको खेलकुद विकासमा थप सहयोग पुग्ने विश्वास व्यक्त गरे । कार्यक्रमका प्रमुख अतिथि समेत रहेका नगर प्रमुख थापामगरले खेलकुद विकासका लागि नगरले अभियान कै रुपमा चलाएको एक वडा एक खेल मैदन निर्माणले विगतको भन्दा यस वर्ष खेलकुदमा धेरै सुधार भएको दावी गरे ।
कार्यक्रमका विशिष्ट अतिथि एवं रामेछाप नगरपालिकाका उपप्रमुख सृजना खड्काले नगर भित्रका म्याध्यमिक तहका सबै विद्यालयका छात्र छात्राले विभिन्न खेलमा भाग लिन पाउने भएकाले आन्तरिक रुपमा प्रतिस्पर्धा गरेर शक्तिशाली टिम छनौट गरेर बाह्य पालिका वा बाह्य जिल्लामा खुल्ला प्रतिस्पर्धामा भाग लिन राष्ट्रपति रनिङ शिल्डले सहयोग पुग्ने बताइन् । खेलकुदले सबै खेलाडीलाई अनुशासनको परिधिमा बाध्ने भएकाले खेल अवाधि भर अनुशासित भएर आफ्नो खेल प्रर्दशन गरे त्यसले प्रत्येक खेलाडीको भविष्य राम्रो हुने उपप्रमुख खड्काको भनाई रहेको छ ।
यस अघि २०७७ चैत्र १९ गते बाट संचालन हुने भनिएको भएपनि कोरोना भाइरसका कारण स्थगित भएको प्रतियोगिता शुक्रबार देखि स्वास्थ्य सुरक्षाका मापदण्ड अपनाउँदै सुरु गरिएको रामेछाप नगरपालिकाका प्रमुख प्रशासकीय अधिकृत रामचन्द्र लामगादेले बताए ।
भलिबल, कबड्डी, सर्टफुट, दौड, ज्याबलिङ थ्रो लगायतका खेलहरु हुने प्रितयाेगिताको सुरुवात नगर प्रमुख नर बहादुर थापामगर र उपप्रमुख सृजना खड्काले ज्याबलिङ थ्रो खेल खेलेर सुरुवात गरेका छन्।
