रामेछाप- नेपाल पत्रकार महासंघ बागमती प्रदेश समितिको कोषाध्यक्ष र महिला सदस्य पदमा रामेछापबाट दुई जनाले उम्मेद्वारी दिएका छन् । नेपाल प्रेस युनियनको तर्फबाट शिव देवकोटाले नेतृत्व गरेको समूहमा रामेछापबाट रमेश ढुंगेल कोषाध्यक्ष र ज्ञानु श्रेष्ठ महिला सदस्यमा उम्मेद्वारी दिएका हुन् ।
कोषाध्यक्षका उम्मेद्वार ढुंगेल नेपाल पत्रकार महासंघ जिल्ला शाखा रामेछापको वर्तमान अध्यक्ष समेत हुन् । त्यस्तै महिला सदस्यका उम्मेद्वार ज्ञानु श्रेष्ठ डब्लुडब्ले जे जिल्ला शाखा रामेछापको वर्तमान अध्यक्ष हुन् ।
कोषाध्यक्ष र महिला सदस्यमा उम्मेद्वारी दिएका ढुंगेल र श्रेष्ठले श्रमजीवि पत्रकारको हकहितको लागि आफूहरुको उम्मेद्वारी भएकाले बागमती प्रदेशका दशै जिल्लाका सबै पत्रकारहरुलाई मतदान गर्न अनुरोध गरेका छन् ।
शिव देवकोटा अध्यक्षको उम्मेद्वार रहेको समूहमा खुला उपाध्यक्षमा रुपेश दुलाल, महिला उपाध्यक्षमा नानीमैया कार्की (सम्झना), महासचिवमा कृष्ण सारुमगर, खुला सचिव युवराज पुरी, समावेशी सचिवमा राजन वि.क (गाउँले) र कोषाध्यक्षमा रमेश ढुङ्गेल रहेका छन् । त्यस्तै खुला सदस्यहरुमा क्रमशः रामहरी गजुरेल, जीवन कुँवर, सन्तोष भुजेल, सुदीप शिवाकोटी, श्याम प्रसाद खतिवडा र सुजन विडारी रहेका छन् । आदिवासी जनजाति सदस्यमा काजी श्रेष्ठ र पेमा लामा, महिला सदस्यमा ज्ञानु श्रेष्ठ, सम्झना हुमागाई र अञ्जु तामाङ, मधेसी सदस्यमा सरिता महत्तो शाह र प्रविण कुमार दत्त, दलित सदस्यमा केशव नेपाली रहेका छन् ।
चैत्र २५ गते हुने निर्वाचनमा उम्मेद्वारी दर्ता गराएका उम्मेद्वार सहितको टोली अहिले बागमती प्रदेशका दशै जिल्लामा पुग्ने अभियान चलाइरहेका छन् ।
