उमाकुण्ड गाउँपालिकामा आलु उत्पादन गर्ने किसानलाई नै आलु चिप्स बनाउने तालिम

रामेछाप– उमाकुण्ड गाउँपालिकाले गाउँमै ८० जना उद्यमी उत्दान गर्ने कार्यक्रम अन्तरगत ७ जना किसानलाई आलु चिप्स बनाउने तालिम दिएको छ । गाउँपालिकाले गरिवी निवरणका लागि लघु उद्यम विकास कार्यक्रम मार्फत गाउँपालिकाको वडा नं ४ मैदानेका ७ जनालाई गाउँमै उत्पादन भएको आलुबाट आलु चिप्स बनाउने तलिम दिएको हो ।

गाउँपालिकाको आर्थिक सहयोग तथा ग्रामिण विजनेश प्रमोशन प्रा.लिको प्राविधिक सहयोगमा संचालित तालिमबाट चिप्स बनाउने, प्याकिङ गर्ने, बजार सम्म लैजाने लगायतका विषयमा सहभागीहरुले तालिम लिएका छन् ।

७ दिन सम्म संचालन भएको तालिम समापन कार्यक्रममा बोल्दै गाउँपालिका उपाध्यक्ष उर्मिला कार्कीले व्यवसायिक रुपमा उद्यम गर्न चहानेहरुका लागि तालिमले व्यवसाय गर्न मद्दत पुग्ने बताइन् । आलु जोन लागु भएको क्षेत्रमा आलु चिप्स बनाउने तालिमले किसानलाई थप व्यवसायिक बनाउने उपाध्यक्ष कार्कीको भनाई रहेको छ । तालिम व्यवहारिक भएकाले स्थानीयको आर्थिक उन्नतीमा थप सहयोग पुग्ने उनले बताइन् । कार्यक्रमको प्रमुख अतिथि समेत रहेकी उपाध्यक्ष कार्कीले तालिम लिएकाले उद्योग स्थापना गर्ने गरी व्यवसाय सुरु गरे गाउँपालिकाले आर्थिक, भौतिक लगायतका सबै सहयोग उपलब्ध गराउने प्रतिबद्धता जनाइन् ।

उमाकुण्ड गाउँपालिकामा चक्ला बन्दीमा आलु खेतीको सुरुवात भएसँगै आलुबाट आलु चिप्स बनाउने तालिमले यहाँ उत्पादन हुने आलुको समेत सदुपयोग हुने उमाकुण्ड गाउँपालिकाका प्रमुख प्रशासकीय अधिकृत इश्वरी प्रसाद सुवेदीले बताए । गाउँपालिकाले आलु चिप्स बनाउन आवश्यक पर्ने प्रविधि समेत आवश्यकता अनुसार सहयोग गर्ने सुवेदीले बताए ।

गाउँपालिकाले यस अघि फलफूलबाट जुस र क्याण्डी बनाउनको लागि ९ जना, सिस्नुबाट पौडर बनाउनको लागि १५ जना, डेरी र बेकरी तालिमबाट दुध तथा दुधजन्य बस्तु उत्पादन गर्न गर्न १३ जनालाई तालिम दिइसकेको गाउँपालिकाका वरिष्ठ उद्यम विकास सहजकर्ता रन बहादुर कार्कीले बताए । लघु उद्यमको मर्म र भावना अनुसार स्थानीय स्तरमै पाइने कच्चा पदार्थ प्रयोग गर्दै संचालन गरिएको तालिम प्रभावकारी हुने दावी गरे ।

८० जना नयाँ उद्यमी उत्पादन गर्ने गरी सुरु गरिएको तालिममा कृषि र पशुपालनको तालिम बाँकी रहेको र त्यसलाई पनि चाँडै सुरु गरिने ग्रामिण विजनेश प्रमोशन प्रालिका सहजकर्ता यसोदा अधिकारीले बताइन् ।

कार्यक्रम उमाकुण्ड गाउँपालिका वडा नं ४ का वडाध्यक्ष मान बहादुर सुनुवारको अध्यक्षतामा मंगलबार सम्पन्न भएको हो ।