रामेछाप– प्रधानमन्त्री कृषि अधुनिकीकरण परियोजना, परियोजना कार्यान्वयन इकाई रामेछापले यस वर्ष जुनार जोन कार्यक्रम अन्तरगत पचास प्रतिशत अनुदानमा १२ हजार सुन्तला जातको विरुवा किसानलाई दिने योजना अगाडी सारेको छ । परियोजनाले जुनार जोन लागु भएको रामेछाप नगरपालिकाको वडा नं ७ मा तीन ओटा कृषी समूह तथा फार्म मार्फत सुन्तला जात भित्र पर्ने जुनार, सुन्तला र कागातीका गरी १२ हजार विरुवा पचास प्रतिशत अनुदानमा किसानलाई उपलब्ध गराउने योजना रहेको बताएको छ ।
सोमबार ग्रामिण विजनेश प्रमोशन प्रालिले सुकाजोरको भालुखोप कार्कीटोलमा करिव ४० घरका किसानको २ सय रोपनी भन्दा बढी क्षेत्रफलमा ४ हजार जुनारको विरुवा रोप्ने विषयमा किसानहरुसँग छलफल गरेको छ । छलफलमा सहभागी भएका प्रधानमन्त्री कृषि अधुनिकीकरण परियोजना, परियोजना कार्यान्वयन इकाई रामेछापका कार्यालय प्रमुख होमनाथ लम्सालले यस वर्ष सुकाजोरमा १२ हजार सुन्तला जातको बिरुवा किसानलाई उपलब्ध गराउने बताए । त्यस्तै जुनार रोप्नको लागि खाडाल खन्न, सिंचाइको लागि पाइप खरिद र पोखरी निर्माण गर्ने लगायतको लागि परियोजनाले किसानलाई पचास प्रतिशत अनुदान दिने लम्सालले बताए । परियोजनाले किसानहरुलाई जुनार रोप्नको लागि प्राविधिक सहयोग उपलब्ध गराउने छ ।
रामेछाप नगरपालिका वडा नं ७ सुकाजोरका वडाध्यक्ष समिर कार्कीले परियोजनाले सुकाजोरलाई जुनार पकेट कार्यक्रम मार्फत जुनार खेती बिस्तार गर्नु धेरै राम्रो भएको बताए । वडाध्यक्ष कार्कीले परियोजनाले लिएको लक्ष्य अनुसार जुनार पकेट कार्यक्रममा किसानले पनि सक्रियता देखउन सके मात्रै भविष्यमा सुकाजोरलाई जुनारको वडा भनेर चिनाउन सकिने भएकाले आफ्नै काम हो भनेर लाग्न अनुरोध गरे । जुनार पकेट कार्यक्रमलाई सफल बनाउन किसान, संस्था र परियोजनालाई वडा कार्यालयले आवश्यक सहयोग गर्ने प्रतिवद्धता समेत वडाध्यक्ष कार्कीले जनाए ।
ग्रमिण विजनेश प्रमोशन प्रालिका अध्यक्ष गुञ्ज बहादुर कार्कीले भालुखोप कार्की टोलमा यस अघि पनि केही जुनारको खेती भएको भएपनि जुनार जोन कार्यक्रमले व्यवसायिक जुनार खेतीमा सहयोग पु¥याउने बताए । २ सय भन्दा बढी क्षेत्रफल जग्गामा लगाइने जुनारको विरुवाले बाँजो अवस्थामा परिणत हुन लागेको जग्गाको सदुपयोग हुनुको साथै किसानहरुको जीवकिो पार्जनमा समेत सहयोग पुग्ने बताए । जुनार जोनका सचिव समेत रहेका कार्कीले जुनार जोन मार्फत सुकाजोरको हिलेपानी र मुडाजोरमा पनि जुनार पकेट कार्यक्रम रहेको बताए ।
परियोजनाले रामेछाप नगरपालिकाको वडा नम्बर ३ र ९ बाहेकका ७ वटा वडा तथा मन्थली नगरपालिकाको वडा नम्बर ४ र ६ लाई जुनार जोन घोषणा गरेर काम गरीरहेको छ ।
