दुर्गा भुजेल/ काठमाडौं- लोकदोहोरी दिवसको अवसरमा राष्ट्रिय लोक तथा दोहोरी गीत प्रतिष्ठान केन्द्रिय कार्यसमितिले स्वास्थ्य सेवासहित लोकदोहोरी दिवस मनाएको छ । प्रतिष्ठानको आयोजनामा शनिबार केन्द्रीय कार्यालयको प्राङ्गणमा निःशुल्क स्वास्थ्यसेवाको कार्यक्रम राखिएको थियो । बसुन्धरास्थित चिरायु नेशनल हस्पिटलको सहयोगमा निःशुल्क नाक, कान, घाँटी, परीक्षण सँगै रक्तदान समेत गरिएको छ ।
लोकदोहोरी दिवस मनाउने क्रममा सामाजिक कार्य गर्न पाउनु सबैभन्दा उत्तम भएको कार्यक्रमका सहसंयोजक तथा प्रतिष्ठानका प्रथम उपाध्यक्ष पशुपति शर्माले जानकारी दिए । शर्माका अनुसार ११६ जनाको स्वास्थ्य परीक्षण गरिएको छ ।
लोकदोहोरी क्षेत्रमा क्रियाशील कलाकारको स्वास्थ्य परीक्षण गराउन लोकदोहोरी दिवस एउटा महत्वपूर्ण अवसरमा भएको प्रतिष्ठानका केन्द्रीय महासचिव सुबास केसिले बताए । कार्यक्रममा स्वास्थ्य परीक्षण गराउने कलाकारको राम्रो उपस्थिति रहेको र सबैको सहयोगले कार्यक्रम सम्पन्न भएको केसीले जानकारी दिए ।
त्यसैगरी कार्यक्रमका प्रमुख अतिथि पूर्व अध्यक्ष दुर्गा रायमाझीले कलाकारको स्वस्थ्य परीक्षण गराउन पाउनुले लोकदोहोरी दिवस अर्थपूर्ण बनेको बताए । उनले कलाकारहरुको स्वास्थ्यमा ध्यान दिँदै निःशुल्क स्वास्थ्य परीक्षण गराउने कार्यले समाजिक उत्तरदायित्वप्रति प्रतिष्ठान अग्रसर रहेकोमा खुशी व्यक्त गरे ।
‘स्वस्थ जीवनका लागि स्वस्थ संगीत’ भन्ने आदर्शका साथ लोक दोहोरी दिवस २०७७ को शुभ अवसरमा प्रदेश जिल्ला र विदेश शाखाहरुले भव्य रुपमा कार्यक्रमहरु आयोजना गरिएको प्रतिष्ठानका केन्द्रीय अध्यक्ष रमेश बिजीले जानकारी दिए । केन्द्रीय कार्यालयमा गरिएको निःशुल्क स्वास्थ्य शिविरमा सहयोग पुयाउने सम्पूर्ण सहयोगी कलाकार एवं स्वास्थ्यकर्मीलाई हार्दिक आभार प्रकट गर्दै अध्यक्ष बिजीले सहयोगको लागि चिरायु नेशनल हस्पिटलको सहयोग अनुतलनीय रहेको बताए । अध्यक्ष बिजीले प्रमुख आतिथ्यताको लागि आदरणीय दुर्गा रायमाझीज्यु र विशेष उपस्थितीको लागी निवर्तमान अध्यक्ष बद्री पंगेनी लगायतलाई विशेष धन्यवाद ब्यक्त गर्नुभएको थियो । त्यस्तै चिरायु नेशनल हस्पिटल र लोकदोहोरी गीत प्रतिष्ठान नेपालको आगामी दिनमा पनि कलाकारहरुका लागि निःशुल्क स्वास्थ्य परीक्षण गराउने र उपचारमा प्रतिष्ठानको परिचयपत्रका आधारमा केहि प्रतिशत छुट दिने सहमति भएको चिरायु नेशनल हस्पिटलका बिजनेस डेप्लोमेन्ट मेनेजर हिमाल बहादुर रानाले जानकारी दिए ।
