रामेछाप– लामो समय पछि निर्माण कार्य सुरु भएको सेलेघाट–साँघुटार जोड्ने सेलेघाट–रामेछाप–साँघुटार सडक आयोजनाले सार्वजनिक सम्पत्ति ध्वस्त पार्ने देखि सडक आसपासका नागरिकलाई बेवास्ता गर्दै काम अगाडि बढाएको स्थानीयले आरोप लगाएका छन् । रामेछाप नगरपालिका वडा नं २ देउरालीका वडा सदस्य सहित आयोजनाबाट प्रभावित भएका स्थानीयले आइतबार पत्रकार सम्मेलन गरी आयोजनाले सार्वजनिक सम्पत्ति ध्वस्त पार्ने देखि स्थानीयसँगको यस अघिको सम्झौता विपरित व्यक्तिको नीजि सम्पत्तिलाई समेत ध्वस्त पारेर काम अगाडि बढाएको आरोप लगाएका हुन् ।
आयोजनाले सार्वजनिक देखि व्यक्तिको नीजि सम्पत्तिलाई समेत क्षति पुर्याएर काम अगाडी बढाएको र त्यस्ता क्षति हुने कार्य तत्काल रोकेर स्थानीयसँग समन्वय गरेर अगाडी बढ्न अनुरोध गर्दै प्रमुख जिल्ला अधिकारीलाई ध्यानाकर्षण पत्र बुझाउने कार्यक्रम अघि पत्रकार सम्मेलन मार्फत आयोजना स्थलको बस्तुस्थितिको बारेमा स्थानीयले जानकारी गराएका छन् ।
पत्रकार सम्मेलनमा रामेछाप नगरपालिका वडा नं २ देउरालीका वडा सदस्य समेत रहेका सुशिलहरी बख्रेलले आयोजनाले स्थानीय सम्पदाको रुपमा रहेका पुराना बरपिपल, चौतारा, ढुंगेधारा, पानी कुवा, सडक बिस्तार क्षेत्र आसपास रहेका धार्मिक स्थल लगायतका संरचनामा क्षति पुर्याएको बताए । त्यस्तै मानिस हिड्ने गोरेटो बाटो भत्काइएको, पानीका कुलो पुरिएको, मानिसको घरलाई जोखिम बनाएर सडक बिस्तार गरिएको, खेतीयोग्य जमिनमा माटो थुपार्ने जस्ता काम आयोजनाले लापरवाही तरिकाले गरेको उनले आरोप लगाए । त्यस्तै देउरालीका अर्का स्थानीय राम बहादुर बुढाथोकीले सडक बिस्तार क्षेत्रमा बसोबास गर्ने स्थानीयको स्वास्थ्यलाई समेत असर पर्ने गरी धुलो उडाएर काम भइरहेको बताए । उनले सडक बिस्तारको क्रममा निर्माण कम्पनी र आयोजनाको तर्फबाट निर्माण क्षेत्रमा बस्ने प्रतिनिधिहरुले स्थानीयसँग समन्वय नगर्दा आवश्यक भन्दा बढी क्षति भएको बताए ।
पत्रकार सम्मेलनमा रामेछाप नगरपालिका वडा नं २ देउरालीका सरोज श्रेष्ठ र वडा नं ३ साँघुटारका युवराज सुवेदीले स्थानीयसँग समन्वय नगरी काम गरिदा आयोजना स्थलमा भएको क्षतिलाई तत्काल नरोके स्थानीयले सडक बिस्तारको कार्यलाई अवरुद्ध गरेर काम ठप्प पार्ने चेतावनी दिएका छन् ।
प्रभावित क्षेत्रका स्थानीयले पत्रकार सम्मेलन पश्चात प्रमुख जिल्ला अधिकारीलाई उक्त आयोजनाले आयोजना स्थलमा पुर्याएको क्षतिलाई तत्काल रोक्न अनुरोध गर्दै ध्यानाकर्षण पत्र बुझाएका छन् । ध्यानाकर्षण पत्र बुझाउँदै स्थानीय सुशिलहरी बख्रेलले प्रमुख जिल्ला अधिकारीलाई आयोजनाले देखाएको दादागिरी तत्काल रोकिदिन अनुरोध गरेका छन् ।
ध्यानाकर्षण पत्र बुझ्दै प्रमुख जिल्ला अधिकारी गौलोचन सैंजूले ध्यानाकर्षण पत्रमा उल्लेख भएका विषयलाई मध्यनजर गर्दै आयोजना, निर्माण कम्पनी र स्थानीय सहितलाई राखेर छलफल गरी समस्याको समधान गर्ने बताए ।
उता सेलेघाट–रामेछाप–साँघुटार सडक आयोजनामा कार्यरत आवसिय इन्जिनियर सुर्य प्रसाद ढकालले पत्रकार सम्मेलन गर्दै प्रमुख जिल्ला अधिकारीलाई बुझाइएको ध्यानाकर्षण पत्रमा उल्लेख भए जस्तो सबै समस्या आयोजना स्थलमा नरहेको दावी गरे । प्राविधिक प्रतिवेदन अनुसार काम अगाडी बढाइएको भएपनि भर्खर काम सुरु गरिएकाले निर्माण स्थलमा देखिएका केही समस्यालाई समधान गर्दै अगाडी बढ्ने पनि उनले बताए ।
एक्जीम बैंकको ऋण सहयोगमा निर्माण कार्य सुरु गरिएको सेलेघाट–रामेछाप–साँघुटार सडक आयोजनाको काम भारतिय कम्पनी टेलिकम्युनिकेशन कन्सल्टेन्ट इन्डिया लिमिटेडले जिम्मा लिएको छ । १ अर्ब ४६ करोडको लागतमा ३० महिना भित्र सम्पन्न गरि सक्नु पर्ने सडक करिव ५० किलोमिटर रहेको छ ।
यस्तो छ प्रजिअलाई बुझाएको ध्यानाकर्षण पत्र
