रामेछाप– रामेछापमा ट्राफिक कारबाहीमा ८ महिनाको अवधीमा एक करोड भन्दा बढी राजस्व संकलन भएको छ । चालु अर्थिक वर्षको साउन महिना देखि फागुन महिनाको अन्तिम सम्मको अवधिमा १ करोड ८ लाख ३८ हजार रुपैयाँ राजस्व संकलन भएको जिल्ला ट्राफिक कार्यालय रामेछापले बताएको छ ।
विभिन्न जिल्लाबाट रामेछाप भित्रने, रामेछाप जिल्लाबाट बाह्य जिल्लामा जाने र रामेछाप जिल्ला भित्रै चल्ने सवारीका साधन तथा ढुवानीका साधनलाई ट्राफिक नियम उलंघन गर्दा गरिने कारबाहीबाट उक्त रकम उठेको जिल्ला ट्राफिक कार्यालय रामेछापका प्रमुख रामेश्वर पाण्डेले बताए । ८ महिनाको अवधिमा दश हजार ९ सय सवारी र ढुवानीका साधनहरु कारबाहीमा परेको पाण्डेले बताए । उनका अनुसार लाइसेन्स नभएका मोटरसाइकल र ट्याक्टर बढी कारबाहीमा परेका छन् ।
यात्रु र चालकको सुरक्षाको लागि नियम उलंघन गर्ने ढुवानी तथा सवारीका साधनलाई गरिएको कारबाहीबाट अघिल्ला वर्षको तुलनामा यो वर्ष दुर्घटना निकै कम भएको जिल्ला प्रहरी कार्यालय रामेछापका प्रहरी प्रमुख प्रहरी नायव उपरिक्षक नवराज ढुंगनाले बताए । प्रनाउ ढुंगनाले भने– ‘जिल्लामा सडक बिस्तार भएसँगै सवारीका साधन र ढुवानीका साधन धेरै चल्न थालेका छन् । त्यसरी चल्ने दुबै साधनमा चालकहरुले लापरवाही गर्दा मानिसको ज्यानै जान सक्ने हुँदा हामीले ट्राफिक नियममा कडाई गरेकै कारण दुर्घटनाहरु पनि कम भएका छन् । त्यस्तै मापासे गरेर सवारी र ढुवानीका साधन चलाउने दर घटेको छ भने चालकहरुमा हाम्रै कारणले दुर्घटना बढी हुने रैछ भन्ने कुराको समेत जानकारी भएर नियम पालना गर्ने सोचको विकास भएको छ । राजस्व धेरै उठ्यो भन्ने भन्दा पनि गल्ती गर्नेले कारवाही भोग्यो भन्ने महत्वपूर्ण कुरा हो । तसर्थ हामी जिल्लाको ट्राफिक व्यस्थापनलाई थप सुरक्षित बनाउने अभियानमा सधै रहेका छौँ ।’
करिव ११ हजारको हाराहारीमा कारवाहीमा परेका सवारीका साधान र ढुवानीका साधन चलाउने चालकले अहिले नियमलाई पालना गर्नुको साथै लाइसेन्स देखि आवश्यक सबै कागजपत्र बोक्न थालेको ट्राफिक प्रमुख पाण्डेले बताए ।
आफ्नो प्रतिकृया दिनुहोस्