रामेछाप– रामेछापका प्रमुख जिल्ला अधिकारी गौलोचन सैजुले जिल्लाका सरकारी कार्यालयबाट प्रवाह हुने सेवा छिटो र गुणस्तरिय बनाउने बताएका छन् । मंगलबार देखि जिल्ला प्रशासन कार्यालय रामेछापमा प्रमुख जिल्ला अधिकारीको जिम्मेवारी सम्हालेका प्रजिअ सैजुले विहिबार पत्रकारहरुसँगको परिचयात्मक कार्यक्रममा जिल्लाका सरकारी कार्यालयबाट प्रवाह हुने सेवालाई समय अनुसार छिटो र गुणस्तरिय बनाउँदै जाने बताएका हुन् ।
पत्रकारहरुले जिल्लामा संचालनमा आएका सवारी साधनले मनलाग्दी भाडादर उठाएको, हाइड्रो संचालकहरुले स्थानीयको मागलाई बेवास्त गर्दै दादागिरी शैलीमा काम गर्ने गरेको, जिल्लाका विभिन्न ठाउँमा भइरहेको कालोपत्रे गुणस्तरहिन भएको, नियम विपरित क्रसर उद्योग संचालन गरेको, सरकारी कार्यालयहरुले सूचना लुकाउने गरेको लगायतका समस्या जिल्लामा विगत देखिनै भएको गुनासो राखेका थिए ।
पत्रकारहरुले जिल्लामा भएका समस्या राखेपछि प्रमुख जिल्ला अधिकारी गौलोचन सैजुले समस्या समधानको लागि आफू सबैसँग सहकार्य गरेर अगाडी बढ्ने बताएका छन् । सरकारी कार्यालयबाट प्रवाह हुने सेवालाई गुणस्तरिय बनाउने देखि कार्यालयमा हुने सूचनामा आम नागरिकको सहज पहुँच हुने गरी काम गर्ने प्रतिबद्धता जनाएका छन् ।
यसअघिका प्रजिअ अर्जुन कुमार शर्माको दुई महिना नपुग्दै रामेछापबाट सरुवा भएपछि अध्यागमन कार्यालय रहेका सैजुलाई फागुन १४ गते गृह मन्त्रालयले रामेछापको प्रजिअमा पठाएको हो ।
