संगिता श्रेष्ठ/रामेछाप– नेपाल प्रेस युनियन जिल्ला शाखा रामेछापको सातौ साधारणसभा तथा बनभोज कार्यक्रम शनिबार सम्पन्न भएको छ । नेपाल प्रेस युनियन रामेछाप शाखाको स्थापना देखि हाल सम्मको अवस्था, व्यवसायिक र क्रियाशिल पत्रकारिताका विषयमा छलफल गर्दै सातौ साधारणसभा सम्पन्न भएको हो ।
७ औं साधारसभा एवं बनभोज कार्यक्रमको उद्घाटन समारोहमा आफ्नो भनाई राख्दै नेपाल प्रेस युनियन बागमती प्रदेश विशेष समितिका सचिव हिमाल ढुंगेलले पछिल्लो समयमा पत्रकारहरुको संख्या बृद्धि भएपनि पत्रकारहरुले लेख्ने समाचारको गुणस्तरियता खस्कँदै गएको बताए । कार्यक्रमका प्रमुख अतिथि समेत रहेका ढुंगेलले हरेक पत्रकारले समाचार लेख्दा गुणस्तरितामा ख्याल गर्दै पाठकले खोजेको विषयबस्तुलाई आफ्नो प्राथमिकतामा राखेर आफ्नो पेशालाई व्यवसायिकतामा लैजनु पर्नेमा जोड दिए ।
कार्यक्रमका विशिष्ट अतिथि रहेका पत्रकार महासंघ बागमती प्रदेशका सदस्य बद्री नयाँघरेले नेपाल प्रेस युनियनको इतिहासलाई स्मरण गर्दै पत्रकारहरुले देशको परिस्थति बुझेर चलाएको कलम कै कारण देशमा ठूलठूला परिवर्तन भएको बताउँदै अहिलेको बर्तमान अवस्थामा देश विकासको क्षेत्रमा टेवा पुग्ने गरी चलाउनु पर्नेमा जोड दिए । नेपाल प्रेस युनियन रामेछाप शाखाको संस्थापक अध्यक्ष समेत रहेका नयाँघरेले आफ्नो कार्यकाल देखि अहिले सम्म आउँदा प्रेस युनियनमा ७० जना भन्दा बढी सदस्य हुनु पत्रकारिताको विकासमा थप सहयोग पुगेको बताए ।
नेपाल पत्रकार महासंघ रामेछापका अध्यक्ष रमेश ढुंगेलले पछिल्लो समयमा धेरै युवाहरु पत्रकारितामा आए पनि व्यवसायिक पत्रकारितामा चासो नदिदा पेशा दिर्घकालिन नहुने भएकाले व्यवसायिक पत्रकारितामा जोड दिनु पर्ने बताए । त्यस्तै नेपाल पत्रकार महासंघका पूर्व अध्यक्ष टिका प्रसाद भट्टले अहिलेको पत्रकारितामा व्यवसायिकता र क्रियाशिलता हराउँदै गएको बताए । उनले पछिल्लो समयमा पत्रकारितामा केही विकृति समते भित्रिएको भन्दै त्यो विकृतिलाई हटाउन प्रेस युनियनले पनि भूमिका खेल्नु पर्नेमा जोड दिए ।
उमाकुण्ड गाउँपालिका वडा नं ३ कुबुकास्थलीका वडाध्यक्ष रमेश कुमार सुनुवारले पत्रकारहरुले तीन तहका सरकारहरुले गरीरहेका हरेक कामको बारेमा मुल्यांकन गर्दै गाउँ–गाउँमा भइरहेका गतिविधिलाई आम जनता माझ पु¥याउनु पर्नेमा जोड दिएका छन् । नेपाल प्रेस युनियनका सदस्य समेत रहेका वडाध्यक्ष सुनुवारले आम नागरिकलाई सही सूचना सम्प्रेसन गरेर नागरिकका समस्यालाई सरोकारवालामाझ पु¥याउन पत्रकारहरुलाई सुझाव दिए ।
नेपाल ट्रेड युनियन काँग्रेस रामेछापका अध्यक्ष पूर्ण सुवेदीले रामेछाप जिल्लामा संचार संस्था र पत्रकारहरुको संख्या बढ्नु राम्रो भएको बताउँदै संचार संस्थाहरुको दिगोपना र पत्रकारहरुको दक्षतामा सबै पत्रकारहरु एक भएर लाग्नु पर्ने बताए । त्यस्तै सामुदायिक रेडियो प्रशारक संघ रामेछापका अध्यक्ष दिपक घिमिरेले डिजिटल प्रविधिको युग सुरु भएको बताउँदै सबै पत्रकारहरु प्रविधिलाई प्रयोग गर्दै पत्रकारिताको नयाँ युगमा प्रवेश गर्नु पर्ने धाराण राखे । कार्यक्रमको समापन गर्दै नेपाल प्रेस युनियन रामेछापका अध्यक्ष अप्रिल अधिकारीले प्रेस युनियनको संगठनलाई थप शसक्त बनाउँदै व्यवसायिक र क्रियाशिल पत्रकारितामा युनियनले नयाँ योजनाका साथ काम गर्ने प्रतिवद्धता जनाए ।
नेपाल प्रेस युनियन रामेछापका अध्यक्ष अप्रिल अधिकारीको अध्यक्षतामा भएको सातौ साधारणसभा तथा बनभोज कार्यक्रममा सचिव रामचन्द्र विकले संस्थाको सांगठनिक प्रतिवेदन र कोषाध्यक्ष कुमार श्रेष्ठले आर्थिक प्रतिवेदन प्रस्तुत गरेका छन् ।
कार्यक्रममा जनयुद्ध कालदेखि नै तत्कालिन नेकपा माओवादी निकट रहेर पत्रकारिता गर्दै आएका टंक गौतम नेपाल प्रेस युनियनमा प्रवेश गरेका छन् । लामो समय देखि आफूले गर्दै आएको पत्रकारिताको अनुवभ बताउँदै गौतमले बामपन्थी विचारधारामा रहेर पत्रकारिता गर्दा मुल पार्टीले धेरै दवाव दिएर पत्रकारिताको मर्म नै मार्न खोजेको आरोप लगाउँदै त्यसबाट मुक्त हुन आफू प्रेस युनियनमा आएको बताए ।
आफ्नो प्रतिकृया दिनुहोस्