रामेछाप– सर्वोच्च अदालतले संसद विघटनलाई बदर गरेपछि रामेछापमा दीप प्रज्वलन गरिएको छ । प्रधानन्यायाधीश चोलेन्द्रशम्शेर जबरा, न्यायाधीशहरु विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसीको संवैधानिक इजलासले प्रधानमन्त्री केपी शर्मा ओलीले गरेको संसद विघटन बदर हुने फैसला सुनाएपछि मंगलबार साँझ रामेछापको सदरमुकाम मन्थलीमा संसद विघटनको विपक्षमा रहेका राजनीतिक दल, नागरिक समजा लगायतका व्यक्तिहरुले दीप प्रज्वलन गरेर खुसीयाली मनाएका छन् ।
दीप प्रज्वलन कार्यक्रमलाई संवोधन गर्दै नेकपा दाहाल–नेपाल समूह रामेछापका सचिब एवं बागमती प्रदेश सभा सदस्य शान्ती प्रसाद पौडेलले संविधानको भावना र नेपाली जनताको हकअधिकारको रक्षा गर्दै आफ्नो निर्णय गर्न सक्ने क्षमताको प्रर्दशन गरेर सर्वोच्च अदालत राम्रो काम गरेको बताए । पौडेलले संसद विघटनको विपक्षमा विभिन्न आन्दोलनमा सहभागिता जनाउने सबै नागरिक प्रति धन्यबाद दिँदै बुधबार हुने ¥यालीमा सहभागी हुन समेत अनुरोध गरेका छन् ।
प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गत पुस ५ गते संसद विघटन गरी वैशाख १७ र २७ गते निर्वाचन घोषणा गरेकी थिइन् । त्यसविरुद्ध १३ वटा रिट सर्वोच्चमा दर्ता भएका थिए ।
संसद पुनःस्थापनाको खुसीयालीमा रामेछापमा दीप प्रज्वलन – भिडियो
