प्रहार खबर– बागमती प्रदेशका मुख्यमन्त्री डोरमणी पौडेलले आफूलाई मुख्यमन्त्रीबाट हटाउन दर्ता गरिएको अविश्वासको प्रस्ताव स्वीकृत नहुने दावी गरेका छन् । रामेछापको खाँडादेवी गाउँपालिका–३ मा निर्माण भएको एकिकृत बस्ती हस्तान्तरण कार्यक्रममा बोल्दै मुख्य मन्त्री पौडेलले जनताको पक्षमा राम्रा काम गरेको देखेर आफ्नो नेतृत्वमा रहेको सरकार हटाउने अभियानमा लागेका समूह सफल नहुने दावी गरेका हुन् ।
बागमती प्रदेशको संसदिय दलको नेता चयन हुँदा देखिको घटना क्रम सुनाउँदै मुख्य मन्त्री पौडेलले भने– ‘जुन दिन म संसदिय दलको नेतामा चयन भए, त्यहि दिन देखि मबाट पराजित अष्टलक्ष्मी साक्यले मेरा विरुद्ध विभिन्न षड्यान्त्रहरु सुरु गर्नुभयो । त्यहि कारणले सधैभरी आतंकित भएर बस्नु पर्ने भयो । उहाँहरुले अहिले मात्रै हैन यस अघि देखि नै सधैभरी अविश्वासको प्रस्तावको धम्की दिइरहनुभयो । जसको कारण प्रदेश सरकारले राम्रोसँग काम गर्न सकिरहेको छैन् । पाँच वर्षका लागि हारेको मान्छे पाँच मिनेट पनि बस्न नसक्ने कुन संकार हो ? आफू हारेको दिन देखि नै विभिन्न धम्कीहरु दिइरहेको गुटले अहिले पनि अविश्वासको प्रस्ताव दर्ता गराएका छन् । त्यो प्रस्ताव कुनै पनि हालतमा स्वीकृत हुँदैन । र सरकार पनि ढल्दैन । सरकारले जनताको पक्षमा रहेर ढुक्कसँग काम गर्छ ।’
मुख्य मन्त्री डोरमणी पौडेलले दशकौ वर्ष देखि बनेका सरकारले केही काम गर्न नसकेको आरोप लगाउँदै सरकारले वनताको काम गर्न थालेको तीन वर्ष भएको दावी गरे । केपी शर्मा ओलीको नेतृत्वमा सरकार बनेको तीन वर्ष भएको र नेपालमा विकास हुन थालेको पनि तीन वर्ष मात्रै भएको उनले दावी गरे ।
एकिकृत बस्ती माझी समुदायलाई हस्तान्तरण
बाग्मती प्रदेश सरकार र खाँडादेवी गाउँपालिकाको संयुक्त लगानीमा खाँडादेवी गाउँपालिका वडा नं ३ डप्कामा निर्माण भएको एकिकृत बस्ती शनिबार समुदायलाई हस्तान्तरण भएको छ । बाग्मती प्रदेशका मुख्यमन्त्री डोरमणी पौडेलले बस्ती समुदायलाई हस्तान्तरण गरेका हुन् । मुख्यमन्त्री पौडेलले समुदायलाई हस्तान्तरण गरेको एकिकृत बस्तीको साँचो खाँडादेवी गाउँपालिकाका अध्यक्ष प्रेम तामाङले बुझेका छन् ।
प्रदेश सरकारको भूमिसुधार, कृषि तथा सहकारी विकास मन्त्रालयको १ करोड ५० लाख र खाँडादेवी गाउँपालिकाले ७५ लाखको लागतमा निर्माण भएको एकिृत बस्तीमा दुई कोठे ४२ ओटा घर रहेका छन् । २६ रोपनी जग्गामा निर्माण भएको एकिकृत बस्तीले आर्थिक रुपमा पछाडि परेको उक्त क्षेत्रमा बसोबास गर्ने माझी समुदायको आर्थिक उन्नतीलाई थप फाइदा पुग्ने विश्वास गाउँपालिकाले लिएको छ ।
कार्यक्रममा बाग्मती प्रदेशका आर्थिक मामिला तथा योजना मन्त्री कैलाशप्रसाद ढुंगेल, बाग्मती प्रदेशका भूमिसुधार कृषि तथा सहकारी विकास मन्त्री दावादोर्जे लामा, राष्ट्रिय युवा परिषदका कार्यकारी उपाध्यक्ष माधव ढुंगेल, बाग्मती प्रदेशका सांसद प्रदिप कटुवाल, जिल्ला समन्वय समिति रामेछापका प्रमुख प्रेमबहादुर खड्का, खाँडादेवी गाउँपालिका अध्यक्ष प्रेमबहादुर तामाङ, नेकपा रामेछापका (ओली समूह) अध्यक्ष आनन्द श्रेष्ठ लगायतले आफ्नो धाराण राखेका थिए ।
आइतबारको प्रहार खबर साप्ताहिकमा प्रकाशित समाचार
