रामेछाप– प्रतिनिधिसभा विघटन विरुद्ध नेपाली काँग्रेस रामेछापका सुभेच्छुक संस्थाहरुले विरोध प्रर्दशन गरेका छन् । प्रधानमन्त्री केपी शर्मा ओलीले पौष ५ गते संविधान विपरित प्रतिनिधिसभा विघटन गरेको भन्दै संसद पुनस्थापनाको माग सहित नेपाली काँग्रेस रामेछापका १३ सुभेच्छुक संस्थाहरुले संयुक्त रुपमा शनिबार बिहान प्रधानमन्त्रीको कदम विरुद्ध र्यालीको आयोजना गर्दै विरोध प्रर्दशन गरेका हुन् ।
प्रतिनिधिसभा पूर्नवहाली गर, सर्वसत्ताबाद मुर्दावाद, पेशाकर्मीलाई बनायो आहात– महामारीमा पनि दिएन राहत, वर्तमान सरकारको उपहार–महगी कुशासन भ्रष्टाचार जस्ता नारा लेखिएका प्लेकार्ड सहित मन्थलीको वीपीचोकबाट निस्केको र्यालीले मन्थली बजार परिक्रमा गरी नेपाल शिक्षक संघको कार्यालय नजिक पुगेर कोण सभामा परिणत भएको थियो ।
कोणसभामा बोल्दै नेपाली काँग्रेस रामेछापका पार्टी सभापति लवश्री न्यौपानेले नेपाल कम्युनिस्ट पार्टीको सरकारले संविधानलाई नै मिचेर प्रतिनिधिसभा विघटन गर्नु असंवैधानिक कदम रहेको भन्दै प्रतिनिधिसभा पुनस्थापना गर्नको लागि काँग्रेसले विभिन्न आन्दोलन गर्नु परेका बताए । कोणसभा कार्यक्रमका प्रमुख अतिथि समेत रहेका पार्टी सभापति न्यौपानेले संविधान मिचेर गरेको कामले नेपाल कम्युनिस्ट पार्टीलाई नै सिध्याउने चेतावनी दिए ।
नेपाल ट्रेड युनियन काँग्रेस रामेछापका अध्यक्ष पुर्ण सुवेदीको अध्यक्षतामा भएको कार्यक्रममा नेपाल शिक्षक संघ रामेछापका अध्यक्ष नवराज घिमिरे, नेपाल पत्रकार महासंघ बागमती प्रदेशका सदस्य एवं नेपाल प्रेस युनियन रामेछापका पूर्व अध्यक्ष बद्री नयाँघरे र नेपाल शिक्षक महासंघ रामेछापका महासचिब रामकृष्ण श्रेष्ठ लगायतले आफ्नो धाराण राख्दै प्रतिनिधिसभा विघटनले देशलाई फेरि अफ्टेरो बाटो तर्फ धकेलेको बताएका छन् ।
मन्थलीको वीपीचोकबाट निस्केको र्यालीमा नेपाल ट्रेड युनियन काँग्रेस रामेछाप, नेपाल शिक्षक संघ रामेछाप, नेपाल प्रेस युनियन रामेछाप, नेपाल निजामती कर्मचारी युनियन रामेछाप, नेपाल निर्माण श्रमिक संघ रामेछाप, नेपाल लोकतान्त्रिक गैर सरकारी महासंघ रामेछाप, नेपाल स्थानीय तह कर्मचारी युनियन रामेछाप, नेपाल व्यटिसियन संघ रामेछाप, नेपाल होटल व्यवसायि संघ, नेपाल व्यापार श्रमिक संघ, नेपाल कृषि श्रमिक संघ, युवा श्रमिक संघ, नेपाल साँकृतक श्रमिक संघ रामेछाप लगायतका प्रमुख एवं प्रतिनिधि र नेपाली काँग्रेसका नेता तथा कार्यकर्ताको सहभागिता रहेको छ ।
आफ्नो प्रतिकृया दिनुहोस्