रामेछाप– खाँडादेवी गाउँपालिकामा नागरिक आरोग्य सेवा केन्द्र स्थापना भएको छ । बागमती प्रदेश सरकार सामाजिक विकास मन्त्रालय अन्तरगत जिल्ला आयुर्वेद रामेछापले संचालन गर्ने गरी खाँडादेवी गाउँपालिकाको वडा नं ८ गागल भदौरेमा सेवा केन्द्रको स्थापना भएको हो ।
आयुर्वेदिक पद्धतिबाट उपचार सहितको योगाभ्यास समेतका सेवा दिने गरी स्थापना भएको सेवा केन्द्रको बागमती प्रदेशका आर्थिक मामिला तथा योजना मन्त्री कैलाश प्रसाद ढुङ्गेलले शुक्रबार उद्घाटन गरेका छन् ।
उद्घाटन कार्यक्रममा बोल्दै मन्त्री ढुङ्गेलले हरेक नागरिकलाई स्वस्थ बनाउनको लागि गाउँ–गाउँमा स्वास्थ्य सेवाहरु पुर्याउने अभियान सरकारको भएकाले गाउँमै नागरिक आरोग्य सेवा केन्द्रको स्थापना भएको बताए । कार्यक्रमका प्रमुख अतिथि समेत रहेका मन्त्री ढुङ्गेलले प्रदेश सरकारकै आर्थिक सहयोगमा नव निर्मित सामुदायिक स्वास्थ्य केन्द्रको भवनमा आरोग्य सेवा केन्द्र पनि सञ्चालनमा आउँदा नागरिकलाई स्वास्थ्य सेवा लिन धेरै सजिलो हुने विश्वास व्यक्त गरे । उनले खाँडादेवी गाउँपालिकाका नागरिकलाई सेवा दिने गरी स्थापना भएको नागरिक आरोग्य सेवा केन्द्रलाई थप व्यवस्थित बनाउन प्रदेश सरकारले सहयोग गर्ने प्रतिबद्धता जनाए ।
आयुर्वेदिक उपचार र योगाभ्यासलाई गाउँ–गाउँमा लैजाने तयारीमा सरकार लागेको पनि मन्त्री ढुङ्गेलले बताए ।
त्यस्तै कार्यक्रमका विशिष्ट अतिथि एवं जिल्ला समन्वय समिति रामेछापका प्रमुख प्रेम बहादुर खड्काले गाउँमै आयुर्वेदिक पद्धतिको उपचार सेवा पाउँदा स्थानीयलाई स्वास्थ्य उपचारका लागि थप सहयोग पुगेको बताए । प्रमुख खड्काले आयुर्वेदिक पद्धतिबाट उपचार गर्दा कम खर्चिलो हुने र रोगहरु पनि सहजै निको हुने भएकाले नागरिक आरोग्य सेवा केन्द्रबाट प्रवाह हुने सेवाको बारेमा आम नागरिकलाई जानकारी गराउनु पर्नेमा जोड दिए ।
खाँडादेवी गाउँपालिकामा स्थापना भएको नागरिक आरोग्य सेवा केन्द्रबाट निःशुल्क स्वास्थ्य परिक्षण, निःशुल्क औषधी वितरण र योगाभ्यास सहितका सेवाहरु प्रवाह हुने जिल्ला आयुर्वेद स्वाथ्य केन्द्र रामेछापका प्रमुख डा. नरेन्द्र प्रसाद गिरीले बताए । जिल्ला आयुर्वेद स्वाथ्य केन्द्र रामेछापमा अत्याधुनिक अस्पताल बनाउन तयार पारिएको डीपि आर पनि त्यही कार्यक्रममा मन्त्रीलाई बुझाइएको प्रमुख डा. गिरीले बताए ।
नागरिक आरोग्य सेवा केन्द्र स्थापना गरिएको भवन बनाउन निःशुल्क १ रोपनी जग्गा दिने उदय बहादुर भण्डारीलाई आर्थिक मामिला तथा योजना मन्त्री कैलाश प्रसाद ढुङ्गेलले दोसल्ला ओढाएर सम्मान गरेका थिए ।
खाँडादेवी गाउँपालिका वडा नं ८ का वडाध्यक्ष इन्द्र बहादुर तामाङ्गको अध्यक्षतामा भएको कार्यक्रममा खाँडादेवी गाउँपालिकाका जनप्रतिनिधि, राजनीतिक दलका नेता, स्थानीय लगायतको सहभागिता रहेको थियो ।
