रामेछाप– रामेछाप जिल्लामा दश महिनाको अवधिमा ६६ हजार भन्दा बढी नागरिकले कोरोना भाइरस विरुद्धको खोप लगाएका छन् । २०७७ माघको दोस्रो साताबाट लगाउन सुरु गरिएको कोरोना भाइरस विरुद्धको खोप विभिन्न समयमा गरेर दश महिनाको अवधिमा ६६ हजार २ सय १९ जना नागरिकले लगाएका छन् । जसमा पूर्ण खोप अर्थात पहिलो र दोस्रो खोपको मात्रा लगाउने ६० हजार ६ सय ४३ जना रहेका छन् । यसरी तथ्यांकमा हेर्दा जिल्लामा पहिलो खोप लगाउनेको संख्या ४८ दशमलव ०८ प्रतिशत रहेको छ भने पूर्ण खोप अर्थात पहिलो र दोस्रो खोप लगाउनेको संख्या ४४ दशमलव ०३ प्रतिशत रहेको छ । स्वास्थ्यको मापदण्ड अनुसार १८ वर्ष भन्दा माथिका उमेर समूहले मात्रै कोरोना भाइरस विरुद्धको खोप लगाउन मिल्ने भएकाले रामेछापमा १८ वर्ष भन्दा माथि उमेर समूहका ४४ दशमलव ०३ प्रतिशतले पूर्ण खोप लगाएका हुन् ।
पूर्ण खोप लगाउनेको संख्या सबै भन्दा बढी मन्थली नगरपालिकामा
दुई नगरपालिका र ६ गाउँपालिका रहेको रामेछाप जिल्लामा सबै भन्दा बढी खोप लगाउनेको संख्या मन्थली नगरपालिकामा रहेको छ । मन्थली नगरपालिकामा पूर्ण खोपको मात्रा लगाउनेको संख्या १६ हजार ३९ जना अर्थात ५१ दशमलव ४७ प्रतिशत रहेको छ । त्यस्तै रामेछाप नगरपालिकामा पूर्ण खोप लगाउनेको संख्या ८ हजार ५ सय १९ अर्थात ४२ दशमलव १३ प्रतिशत रहेको छ ।
खाँडादेवी गाउँपालिकामा ७ हजार ५६ जना अर्थात ४० दशमलव ४७ प्रतिशतले पूर्ण खोपको मात्रा लगाएका छन् । त्यस्तै दोरम्बा शैलुङ गाउँपालिकामा पूर्ण खोप लगाउनेको संख्या ६ हजार ९ सय ४३ अर्थात ४५ दशमलव ४२ प्रतिशत रहेको छ ।
गोकुलगंगा गाउँपालिकामा पूर्ण खोप लगाउनेको संख्या ६ हजार ६२ जना अर्थात ४४ प्रशित रहेको छ । लिखुतामाकोशी गाउँपालिकामा पूर्ण खोपको मात्रा लगाउनेको संख्या ५ हजार ८ सय ५६ जना अर्थात ३७ दशमलव ६५ प्रतिशत रहेको छ ।
उमाकुण्ड गाउँपालिकामा पूर्ण खोपको मात्रा लगाउनेको संख्या ५ हजार ८६ अर्थात ४२ दशमलव २ प्रतिशत रहेको छ । त्यस्तै सुनापति गाउँपालिकामा पूर्ण खोप लगाउनेको संख्या ५ हजार ८२ अर्थात ४१ दशमलव ५२ प्रतिशत रहेको छ ।
पहिलो खोपको मात्रा लगाएर दोस्रो खोप नलगाउनेको संख्या ५ हजार ५ सय ७६ देखिएको भएपनि यि मध्ये अधिकासंले जिल्ला बाहिर नै खोपको दोस्रो मात्रा लगाइसकोको स्वास्थ्य कार्यालय रामेछापको दावी रहेको छ । स्वास्थ्य कार्यालय रामेछापका जनस्वास्थ्य अधिकृत भुवन थापाका अनुसार खोपको पहिलो मात्रा लगाएका केही मानिसहरुले विभिन्न कारणले गर्दा दोस्रो मात्रा नलगाएको भएपनि अधिकासंले अन्य जिल्लाबाट पूर्ण खोपको मात्रा पुरा गरिसकेका छन् ।
रामेछाप जिल्लामा हाल सम्म विभिन्न देशले तयार पारेका कोभिसिल्ड, भेरोसेल, एस्ट्राजेनेका र जोन्सन एण्ड जोन्सन खोप लगाइएको छ ।
प्रहार खबर साप्ताहिकमा २०७८ कार्तिक २८ गते आइतबार प्रकाशित
