रामेछाप– रामेछाप नगरपालिकाको वडा नं ३ साँघुटारमा रहेको हिमगंगा उमाविलाई भौतिक संरचना निर्माण गर्दा भएको खर्च विवरण सार्वजनिक गर्न माग गर्दै स्थानीयले विद्यालयलाई ध्यानाकर्षण पत्र बुझाएका छन् । विहिबार स्थानीय नवराज ढकाल र मनोज खड्का सहितको टोलीले २०७६ साल देखि हाल सम्म विद्यालयमा निर्माण भएका भौतिक संरचनाको हिसब चाडो भन्दा चाडो अभिभावक माझ सार्वजनिक गर्न माग सहित ८ बुँदे ध्यानाकर्षण पत्र बुझाएका हुन् ।
विद्यालयलाई नमूना बनाउनको लागि स्थानीयहरुले सहयोग गर्दा गर्दै विद्यालय प्रशासन, विद्यालय व्यवस्थापन समिति र लेखापालले अभिभावकलाई उपेक्षा गरेर अगाडि बढेको कारण विद्यालयमा हुने रहेक गतिविधिलाई पारादर्शिता बनाउनको लागि आफूहरुले नेतृत्व गरेर ध्यानाकर्षण पत्र बुझाएको मनोज खड्काले बताए । उनले भने– ‘२०७६ साल देखि विद्यालयमा निर्माण सम्पन्न भइसकेका र निर्माण कै क्रममा रहेका भौतिक संरचनाको हिसाब अहिले सम्म स्थानीयलाई देखाइएको छैन् । विद्यालयको लागि आवश्यक पर्ने शौचालय निर्माण गर्न विना प्रतिस्पर्धा पाँच लाखकमा काम भइरहेको छ, जुन काम गर्न त्यहीका स्थानीयले ४ लाखमा गर्छौ भनेका थिए । तर, स्थानीयको मागलाई बेवास्ता गर्दै पाँच लाख मै निर्माण कार्य भइरहेको छ । यसरी कम पैसामा गर्छौ भनेर स्थानीयले भन्दा बढी पैसामा काम दिनु भनेको विद्यालयमा भएको पैसा माथि आर्थिक अनियमितता गर्न खोज्नु हो । यस अघि पनि एक विद्यालय निर्माणको लागि विद्यालय प्रशासनको मिलेमतोमा १४ लाखमा निर्माण गर्न दिएको र उक्त निर्माण कार्यलाई रोकेर हाम्रै पहलमा ११ लाख ८५ हजारमा काम गरायौँ, त्यतिबेला हाम्रो कारणले विद्यालयको दुई लाख १५ हजार जोगायौँ । तर, यस वर्ष भने हामी सफल भएनौँ । जसको कारण विद्यालयलाई आर्थिक भार बढेको छ ।’
विद्यालयका प्रधानाध्यापक अनिरुद्र सुवेदीले स्थानीय सहितको सहभागितामा दिएको ध्यानाकर्षण पत्र विद्यालयको लागि स्वागतयोग्य भएको बताउँदै ध्यानाकर्षण पत्रमा उल्लेख भएका विषय बस्तुमाथि विद्यालय व्यवस्थापन समिति र निदेकहरुलाई समेत राख्ने गरी बैठक राखेर छलफल भएको बताए । उनले भने– ‘विद्यालयमा भएका विभिन्न गतिविधिमा उहाँहरुले उठाउनु भएका बिषयबस्तु स्वागतयोग्य छन् । सोही विषयमा हामीले निवेदक र विद्यालय व्यवस्थापन समितिलाई राखेर बैठक गर्न खेजेका थियौँ तर निवेदकहरुको काम परेको भन्दै आउनु भएन् । उहाँहरु नआएपनि ध्यानाकर्षण पत्रमा उल्लेख भएका ८ बुदाको विषयमा छलफल गरेका छौँ ।’
विना प्रतिस्पर्धामा शौचालय निर्माण गर्न दिएको विषयमा भने विद्यालय व्यस्थापन समितिले निर्णणय गरेर दिएकाले उहाँहरुले भनेजस्तो आर्थिक अनियमितता नभएको प्रअ सुवेदीले दावी गरे । पाँच लाख भन्दा कम लागतमा निर्माण गर्छौ भनेर आधिकारिक रुपमा कसैले पनि नभनेको उनले बताए । ध्यानाकर्षण पत्रमा लेखिएका सबै विषयका बारेमा जानकारी गराउने गरी फागुन १२ गते अभिभावक भेला गर्ने गरी विद्यालय व्यवस्थापन समितिले शुक्रबार निर्णय गरेको पनि प्रअ सुवेदीले जानकारी दिए ।
उता निदेनका विषयमा छलफलका लागि शुक्रबार विहान ११ बजे आफूहरुलाई बोलाईएको र त्यहि समयमा विद्यालयमा गएर साँढे ११ बजे सम्म बस्दा सरोकारवालाहरु नआएपछि आफूहरु हिडेको निदेक मनोज खड्काले बताए । ‘हामी आधा घण्टा बस्यौँ उहाँहरु कोही पनि आउनु भएन, हामी साँघुटार बाहिर गएको चाल पाएपछि मात्रै उहाँहरुले छलफलका लागि बोलाउनुभयो । अनि हामी कसरी जान सक्छौँ र ?’
स्थानीयले बुझाएको ध्यानाकर्षण पत्र
आफ्नो प्रतिकृया दिनुहोस्