रामेछाप– रामेछाप नगरपालिकाको आठौँ नगरसभा सम्पन्न भएको छ । विहिबार सम्पन्न आठौँ नगरसभाले तीन विधेयक, गत आर्थिक वर्षको भौतिक तथा वित्तीय प्रगति र चालु आर्थिक वर्षका लागि विनियोजित नीति तथा कार्यक्रममा हाल सम्म भएका प्रगति प्रतिवेदन पारित गरेको छ ।
नगरपालिकाका नगर प्रमुख नर बहादुर थापामगरको अध्यक्षतामा भएको नगरसभामा नगर उपप्रमुख सृजना खड्काले चालु आर्थिक वर्षका लागी स्वीकृत नीति तथा कार्यक्रहरु र आगामी दिनमा गर्नुपर्ने महत्वपूर्ण कार्यहरुको बारेमा जानकारी गराइन् । त्यस्तै प्रमुख प्रशासकिय अधिकृत रामचन्द्र लामगादेले कार्यसूचीहरु प्रस्तुत गरेका छन् ।
नगरसभाले रामेछाप नगरपालिकाको पूरक विनियोजन विधेयक २०७७, शिक्षा ऐन २०७५ (प्रथम संसोधन) विधेयक २०७७ र वडा नम्बर ३ साँघुटार वडा कार्यालयको जग्गा (केन्द्र) निर्धारण गर्ने विधेयक गरी तीन ओटा विधेयक पारित छ ।
नगरसभामा बोल्दै नगर प्रमुख नर बहादुर थापामगरले गत आर्थिक वर्ष देखि नै सुरु भएको कोरोना भाईरस रोगका कारण सोचे जति काम गर्न नसकिएको बताए । नगर प्रमुख थापामगरले कोरोना रोकथाम तथा नियन्त्रणमा धेरै समय र बजेट खर्च भएको कारणले अन्य विकास निर्माणमा अपेक्षा अनुसारका उपलब्धि हासिल गर्न नसकिएको पनि बताए ।
कार्यक्रममा सबै वडाका वडाध्यक्षहरु, कार्यपालिका सदस्यहरु, रामेछाप नगरपालिकाका सबै शाखाका कर्मचारी लगायतको सहभागिता रहेको छ ।
