गोकुलगंगामा किसानलाई ८० प्रतिशत अनुदानमा किवीको विरुवा वितरण

रामेछाप- रामेछापको गोकुलगंगा गाउँपालिकाले किसानहरुलाई किवी र ओखरको विरुवा वितरण गरेको छ । गाउँपालिका भित्र रहेका कृषि फार्म र किवी खेत गर्ने किसानलाई ८० प्रतिशत अनुदानमा ३ हजार किवी र एक हजार ओखको विरुवा वितरण गरेको हो ।

गोकुलगंगा गाउँपालिकामा व्यवसायिक रुपमा किवी खेती गर्ने किसानहरुलाई केही कृषि फार्म मार्फत पाउने गरी र केही सिधै किसानले नै पाउने गरी किवी र ओखरको विरुवा वितरण गरिएको गाउँपालिका अध्यक्ष खड्ग बहादुर सुनुवारले बताए । अध्यक्ष सुनुवारले भने– ‘गोकुलगंगा गाउँपालिकाका वडा नं ३ रस्नालुलाई किवी पकेट क्षेत्रका रुपमा विकास गरेका छौँ । त्यस्तै अरु सबै वडामा समेत किवी खेती फस्टाउने हुनले यो आर्थिक वर्षमा गाउँपालिका भरीका करिव दुई सय किसानहरु लाभन्वित हुने गरी विरुवा वितरण गरेका छौ । हामीले ८० प्रतिशत अनुदानमा विरुवा दिदाँ किसानहरु कृषिमा आकर्षित हुनुको साथै उनिहरुलाई आर्थिक रुपमा समेत सहयोग पुग्छ ।’

गाउँपालिकाले विगत वर्ष देखि नै किवी खेतीमा किसानलाई सहयोग गर्दै आएको र यस वर्ष गाउँपालिकाभरी करिब २० टन किवी उत्पादन भएको गाउँपालिका अध्यक्ष सुनुवारले बताए ।

कृषि र पशुपालन गरी गाउँपालिकामा १८ ओटा पकेट क्षेत्र बनाएको गाउँपालिकाले मुख्य गरी पशुपालनमा चौरी पालन, माछा पालन, बाख्रा पालन, बंगुर पालन, गाइ पालन, कुखुरा पालन र कृषिमा आलु खेती, किवी खेती, सिमी खेती, केरा खेती, अर्गेली खेती, स्याउ खेती, जडीबुटी खेती जस्ता कुरालाई पकेट कै रुपमा विकास गरेर किसानहरुको आयआर्जनमा बृद्धि गराउँदै कृषि र पशुपालनमा पालिकालाई आत्म निर्भर बनाउने गरी कृषिमा ठूलो लगानी भएको अध्यक्ष सुनुवारको भनाई रहेको छ ।