प्रधानमन्त्री केपी शर्मा ओलीले संविधानको ठाडो उल्लङ्घन गरि असंवैधानिक, अलोकतान्त्रिक एवं स्वेच्छाचारी ढंगबाट प्रतिनिधि सभा विघटन गर्न प्रतिगामी कदम चालेको भन्दै नेकपा दाहाल–नेपाल समूह रामेछापले प्रधानमन्त्रीलाई संविधान अध्ययन गर्न अनुरोध गर्दै संविधन उपहार पठाएको छ ।
दाहाल–नेपाल समूह रामेछापका अध्यक्ष मैन कुमार मोक्तान र सचिव शान्ति प्रसाद पौडेलद्वारा हस्तक्षरित विरोध पत्र सहित संविधानको किताब जिल्ला प्रशासन कार्यालय रामेछाप मार्फत प्रधानमन्त्रीलाई पठाएका हुन् ।
अध्यक्ष मैन कुमार मोक्तान र सचिव शान्ति प्रसाद पौडेलद्वारा जारी विरोध पत्रमा भनिएको छ– ‘तपाईले २०७७ पौष ५ गते नेपालको संविधानको ठाडो उल्लङ्घन गरि असंवैधानिक अलोकतान्त्रिक एवम् स्वेच्छाचारी ढंगबाट प्रतिनिधि सभा विघटन गर्न प्रतिगामी कदम चाल्नु भएकाले हामी त्यसपति तीव्र आपत्ति प्रकट गर्दै घोर विरोध एवम् भत्सना गर्दछौँ । हाम्रो ठुलो बलिदानीपूर्ण संघर्षबाट प्राप्त गरिएको ऐतिहासिक राजनितिक परिवर्तन संघिय लोकतान्त्रिक गणतन्त्र तथा नेपालको संविधानको रक्षा गर्न, वर्तमान असंवैधानिक कदम तथा सबै प्रकारको प्रतिगामी षड्यन्त्रलाई असफल पार्न र त्यसका लागि जस्तोसुकै संघर्ष गर्न नेपाली जनता सक्षम छौँ भन्ने चेतावनी दिन चाहन्छौँ । तपाईलाई राम्ररी थाहा छ, संविधानले प्रधानमन्त्रीलाई प्रतिनिधि सभा विघटन गर्न अधिकार दिएको छैन । तथापी संविधानको सम्बन्धित धाराको पुनः अध्ययन गर्नुहोला भनेर सो धाराको प्रति समेत यसै साथ पठाएका छौँ ।
हामी अझै पनि तपाईलाई आफ्नो असंवैधानिक कदमका निम्ति पश्चातापका साथ राष्ट्रका सामु क्षमायाचना गर्न र प्रतिनिधि सभा सुचारु गरी संविधानलाई क्रियाशिल बनाउने पक्षमा आउन अनुरोध गर्दछौँ र सच्चिन अवसर प्रदान गर्दछौँ ।’
दाहाल–नेपाल समूह रामेछापका जिल्ला ईन्जार्च देवशकंर पौडेल, जिल्ला अध्यक्ष मैन कुमार मोक्तान, सचिब शान्ति प्रसाद पौडेल सहितको टोलीले रामेछापका प्रमुख जिल्ला अधिकारी अर्जुन कुमार शर्मालाई विरोध पत्र सहित संविधान बुझाएका थिए ।
यस्तो छ विरोध पत्रः
आफ्नो प्रतिकृया दिनुहोस्