रामेछाप– रामेछाप नगरपालिकाले पशुपालन कृषकहरुलाई पशुपालनको लागि आवश्यक पर्ने ज्ञान सहितको तालिम दिन थालेको छ । नगरको ९ ओटै वडामा संचालन हुने तालिम बिहिरबार देखि सुरु भएको छ ।
बाख्रा पालक अगुवा कृषकहरुका लागि रामेछाप– १ गोठगाउँबाट सुरु गरिएको तीन दिने तालिमको उद्घाटन गर्दै रामेछाप नगर उपप्रमुख सृजना खड्काले भनिन्– ‘पशुपालनका लागि हाम्रो नगरका ९ वटै वडाका छुट्टा छुट्टै विशेषता छन् । त्यसैको आधारमा हामीले पशुपालन कृषकलाई तालिम दिन थालेका छौँ । जस मध्ये वडा नं १ गोठगाउँ बाख्रा पालनको लागि उपयुक्त देखिएको छ । सोही अनुसार यहाँका बाख्रा पालक अगुवा कृषकहरुलाई तीन दिने तालिम दिन लागिएको हो । यसले उहाँहरुलाई व्यवसायिक बाख्रा पालनमा सहयोग पुग्ने छ ।’
नगरपालिकाले कृषकहरुलाई व्यवासय सुरु गर्दा आवश्यक पर्ने आधारभूत तालिम लिई सकेपछि अनुदान पाइने आश नराखी सुरुमा आफ्नै खर्चमा व्यवसाय गर्दा राम्रो हुने उपप्रमुख खड्काको भनाई रहेको छ । व्यवसाय सुरु गरेर उत्पादन सुरु हुन थालेपछि नगरपालिकाले कृषकहरुलाई थप सहयोग गर्ने पनि उनको भनाई छ । नगरपालिकाले किसानहरुलाई प्राथमिकतामा राखेर योजना बनाएको कुरा बताउँदै उपप्रमुख खड्काले काम गर्न इच्छुक किसानलाई नगरपालिकाले पूर्ण रुपमा सहयोग गर्ने पनि प्रतिबद्धता व्यक्त गरिन् । पशुपालन वा अन्य कृषि फार्महरु संचालन गर्दा सामुहिक रुपमा गरे धेरै राम्रो हुने भएकाले तालिममा सहभागी कृषकलाई पनि सामुहिक रुपमा व्यवसाय गर्न आग्रह गरिन् ।
त्यस्तै कार्यक्रममा बोल्दै नगरपालिकाका अधिकृत होम बहादुर थापाले नगरपालिकाको किसान लक्षित कार्यक्रमहरु गाउँ–गाउँमा पुर्याउने उद्देश्य रहेकाले किसानहरुलाई पशुपालनमा थप आकर्षित गराउनको लागि तालिमले थप सहयोग पुग्ने विश्वास व्यक्त गरेका छन् ।
किसान लक्षित तालिमले कृषकहरुलाई धेरै फाइदा पुग्ने भएकाले नगरपालिकाले वडा–वडामा संचालन गरेको तालिम निकै उपलब्धीमूलक भएको वडाध्यक्ष नर बहादुर थापाको भनाई रहेको छ ।
तीन दिन सम्म चल्ने तालिममा बाख्रा पालन गर्दा बाख्रलाई कस्ता–कस्ता रोग लाग्छन्, रोग लागेपछि कसरी उपचार गर्ने, रोग लाग्न नदिने उपाय, स्थानीय जातबाटै पनि कसरी धेरै आम्दानी लिन सकिन्छ लगायतका बारेमा किसानहरुलाई जानकारी गराईने रामेछाप नगरपालिका पशु शाखाका प्रमुख काजी शेर्पाको भनाई रहेको छ । यस्तो तालिम नगरका ९ ओटै वडामा संचालन हुने पनि प्रमुख शेर्पाको भनाई रहेको छ ।
आफ्नो प्रतिकृया दिनुहोस्