रामेछाप– बागमती प्रदेश बचत तथा ऋण सहकारी संघका महासचिब जीवशराज खड्काले सहकारीको गतिविधिले बैंकहरु आत्तिएको बताएका छन् । रामेछाप जिल्ला बचत तथा ऋण सहकारी संघको १३औं बार्षिक साधारसभामा बोल्दै जनताबाट संचालित सहकारीहरुले दैनिक रुपमा लाखौको कारोबार गर्दै गएको देखेर बैंकहरु आत्तिदै गएको बताएका हुन् ।
“सामान्य नागरिकले जम्मा गरेको केही पैसाबाट एउटा सहकारीले दैनिक लाखौ कारोबार गर्छ, जुन कारोबार अधिकासं बैंकहरुको हुँदैन, महासचिब खड्काले भने, ‘हाम्रो ठूलो कारोबार देखेर उनिहरु आत्तिन थालेका छन् । हाम्रो आर्थिक गतिविधिलाई झन मजबुद र पारदर्शी बनाउन सके बैंकहरु भन्दा हामी अगाडि आउन सक्छौ ।”
स्थानीय सरकारले सहकारीलाई सहयोग नगर्दा स्थानीय तहरुह आर्थिक रुपमा अगाडि बढ्न नसकेको महासचिब खड्काको भनाई रहेको छ । नेफ्सकुनका केद्रिय सदस्य समेत रहेका खड्काले जिल्लामा भएका सहकारीहरुले नेफ्सकुनमा आबद्ध भएर काम गरे धेरै फाइदा हुने बताएका छन् ।
त्यस्तै कार्यक्रममा बोल्दै रामेछाप जिल्ला बचत तथा ऋण सहकारी संघका अध्यक्ष जगन्नाथ दाहालले जिल्लामा रहेका बचत तथा ऋण सहकारी संस्थाहरुले नीति नियममा रहेर पारादर्शि रुपमा काम गर्न सके जिल्लालाई सहकारीको माध्यमबाट नै समृद्ध बनाउन सकिने बताए ।
कार्यक्रममा रामेछाप जिल्ला बचत तथा ऋण सहकारी संघका निवर्तमान अध्यक्ष गोविन्द प्रसाद घिमिरे, नेपाल पत्रकार महासंघ रामेछापका उपाध्यक्ष कैलाश खत्री, विभिन्न सहकारीका प्रतिनिधि लगायतले आ–आफ्नो भनाई राखेका थिए ।
साधारसभामा रामेछाप जिल्ला बचत तथा ऋण सहकारी संघका महासचिब नविन केसीले संघको अघिल्लो वर्ष प्रगति विवरण प्रस्तुत गरेका थिए । त्यस्तै महासचिब केसीले संघले आगामी वर्षका लागि विभिन्न कार्यक्रमहरु सहितको १३ बुँदे प्रस्तावित कार्यक्रमहरु रहेको बताएका छन् ।
रामेछाप जिल्ला बचत तथा ऋण सहकारी संघको कारोबार ४८ लाख माथी
रामेछाप जिल्ला बचत तथा ऋण सहकारी संघको कारोबार ४८ लाख २१ हजार ३ सय ७ रुपैयाँ रहेको छ । आर्थिक प्रतिवेदन प्रस्तुत गर्दै रामेछाप जिल्ला बचत तथा ऋण सहकारी संघका कोषाध्यक्ष पार्वती पाठकले चालु आर्थिक वर्षको पौष महिनाको १० गते सम्मा सहकारीले उक्त कारोबार गरेको बताईन् । त्यस्तै आर्थिक वर्ष २०७६÷०७७ को खुद नाफा ६२ हजार १ सय ३७ रुपैयाँ रहेको प्रतिवेदनमा उल्लेख छ । लेखा सुपरिवेक्षण समितिका संयोजक प्रज्ञान खड्काले लेखा समितिको प्रतिवेदन प्रस्तु गरेका थिए ।
