रामेछाप– रामेछापको लिखुतामाकोशी गाउँपालिकामा १५ शैयाको अस्पताल बन्ने भएको छ । गाउँपालिकाले सोमबार एक सार्वजनिक कार्यक्रमको आयोजना गरी गाउँपालिकाको केन्द्र रहेको धोवीबजार नजिक १५ शैयाको अस्पताल बनाउने योजना सहित शिल्यान्यास गरेको हो । गाउँपालिकाका कार्यवहाक अध्यक्ष दिपशिखा दाहालको अध्यक्षता एवं बागमती प्रदेशसभा सदस्य शान्ती प्रसाद पौडेलको प्रमुख आतिथ्यतामा अस्पतालको शिल्यान्यास गरिएको हो ।
कार्यक्रममा बोल्दै गाउँपालिका कार्यवहाक अध्यक्ष दिपशिखा दाहालले नागरिकको स्वास्थ्य सेवालाई ध्यानमा राख्दै अस्पताल निर्माणको काम चाँडै शुरु हुने बताउनुभयो । उहाँले भन्नुभयो, ‘यहाँका नागरिकहरुको स्वास्थ्यमा सामान्य समस्या देखिएपनि सदरमुकाम मन्थली या काठमाण्डौ धाउनु पर्ने बाध्यता छ, अब अस्पताल बनेपछि त्यो बाध्यता सधैँका लागि अन्त्य हुन्छ । गाउँपालिकाले पनि अस्पताल निर्माणको लागि दुई करोड पैसा विनियोजन गरेको छ । अस्पताल चाँडै निर्माण हुने गरी प्रदेश सरकार, संघीय सरकार र हामी स्थानीय सरकारसँगै मिलेर काम गर्छौ । जसले गर्दा यहाँका नागरिकले आफ्नै गाउँमा चाँडै स्वास्थ्य सेवा पाउन ।’
त्यस्तै अस्पतालको शिल्यानस कार्यक्रममा बोल्दै कार्यक्रमका प्रमुख अतिथि समेत रहेका बागमती प्रदेशसभा सदस्य शान्ती पौडेलले अब बन्ने अस्पतालबाट लिखुतामाकोशी गाउँपालिकाका नागरिक र छिमेकी जिल्ला ओखलढुंगाका नागरिकले समेत राम्रो स्वास्थ्य सेवा पाउने बताउनुभयो । अस्पताल निर्माण देखि अन्य विकास निर्माणको काममा प्रदेश सरकारले सँधै सहयोग भइरहने समेत प्रदेशसभा सदस्य पौडेलले बताउनुभयो ।
