रामेछाप– दशैंको मुखमा जेष्ठ नागरिक, एकल महिला र अपाङ्गता भएका व्यक्तिलाई घरमै दशैं खर्च आइपुग्दा त्यो भन्दा खुसी उनिहरुका लागि के हुन सक्छ र ? तीन दिन देखि सामाजिक सुरक्षा भत्ता बोकेर घर–घरमै पुगेका रामेछाप नगरपालिका वडा नं ५ रामपुरका वडाध्यक्षले पनि उनिहरुको खुसीलाई शब्दमा व्यक्त गर्ने अर्को शब्द नभएको अनुभव गर्छन् ।
आफू निर्वाचित भएदेखि नै घर–घरमै पुगेर भत्ता वितरण दर्गा देखिको अनुभव सुनाउँदै वडाध्यक्ष भिम बहादुर तामाङले भने– ‘नागरिकले पाउने सेवा सहज तरिकाले दिनु हाम्रो कर्तव्य हो । स्थानीय सरकार आउनु पहिला सामाजिक सुरक्षा भत्ता लिनकै लागि वडा कार्यालय र सदरमुकाम धाउँदा शारिरीक पीडा, मानिसक पीडा र आर्थिक भारलाई मध्यनजर गरेर हामीले उहाँहरुको घरमै पुगरे भत्ता दिन थाल्यौं, यो सेवाले उहाँहरुको खुसी अहिले सम्म पनि मापन गर्न सकेका छैनौं । उहाँहरुको खुसी नै हाम्रो खुसी हो । यसलाई हाम्रो कार्यकालभरी अझ सहज तरिकाले दिने गरी निरन्तरता दिन्छौं ।’
वडामा जेष्ठ नागरिक, एकल महिला, अपाङ्गता भएका व्यक्ति, दलित जेष्ठ नागरिक र दलित बालबालिका गरि ४ सय ७३ जनालाई नजिकको टोल र टोलमा आउन नसक्नेहरुको घरमै पुगेर चालु आर्थिक वर्षको पहिलो चौमासिकको रकम वितरण गरिएको वडाध्यक्ष तामाङले बताए । यसरी घरमै पुगेर भत्ता उपलब्ध गराउँदा उनिहरुलाई परेको थप समस्या पनि जानकारी हुने र भावी योजना बनाउन समेत सहयोग पुग्ने अध्यक्ष तामाङको भनाई रहेको छ ।
राष्ट्रिय परिचयपत्र तथा पञ्जीकरण विभागले सामाजिक सुरक्षा वितरणलाई पारदर्शी बनाउन स्थानीय तहमा अनिवार्य बैंकिङ प्रणालीबाट सामाजिक सुरक्षा भत्ता वितरण गर्ने निर्णय गरेको भएपनि वडा कार्यालय सम्म आउन नसक्ने सेवाग्राहीका लागि त्यस्तो प्रणाली अव्यावहारिक हुने हुँदा आफ्नो कार्यकालभरी लक्षित वर्गकै अनुरोधमा जोखिम मोलेरै भएपनि सामजिक सुरक्षा भत्ता घरघरमै पु¥याउने अध्यक्ष तामाङले प्रतिवद्धता जनाए ।
९ वटा वडा रहेको रामेछाप नगरपालिकाका अधिकांस वडाहरुले घरघरमै पुगेर भत्ता वितरण गरिसकेका छन् ।
