रामेछाप– रुकुम पश्चिमको सानी भेरी गाउँपालिका वडा नं १० अर्माडाँडामा रहेको सरस्वती माध्यामिक विद्यालयको घेराबार तथा खेल मैदान निर्माणको लागि सोही विद्यायमा अध्ययन गरेका बम बहादुर सिर्पाइली जुटेका छन् । मनास्लु हिमाल आरोही सोही गाउँपालिका घर भई हाल रामेछाप जिल्ला निर्वाचन कार्यालयमा नायब सुब्बा पदमा कार्यरत सिर्पाइली आफूले एस.एल.सी उतिर्ण गरेको विद्यालयको घेरा बार र खेल मैदान बनाउने अभियानमा जुटेका हुन् ।
प्राविधिक स्टमेट तयार गर्दा दुबै काम सम्पन्न गर्न करिव ११ लाख लागत लाग्ने र उक्त रकम भदौ महिनाको अन्तिम सम्ममा आफ्नो पहलकदमीमा सहयोग उठाई विद्यालयलाई हस्तान्तरण गरिने सिर्पाइलीले बताए । सिर्पाइलीले भने– ‘एस.एल.सी. सम्म मैले यहि विद्यालयमा पढेको हो । सबै कुरा दिने यो विद्यालयलाई मैले पनि केही दिनु पर्छ भन्ने लाग्यो । त्यसैले भौगोलिक विकटताका कारण खेलकुदबाट बञ्चितमा परेका विद्यार्थीहरुलाई मध्यनजर गर्दै सबैसँग सहयोग उठाएरै भएपनि खेलको माध्यमबाट यो विद्यालयलाई चिनाउने उद्देश्य सहित अहिले यो अभियानमा लागेको छु ।’ सिर्पाइलीका अनुसार अहिले सम्ममा नगद र सामग्री गरी तीन लाख माथीको सहयोग जुटेको छ ।
सानी भेरी गाउँपालिकाको वडा नं १० र ११ मा रहेको सरस्वती माध्यमिक विद्यालयमा अहिले कक्षा १ देखि कक्षा १२ सम्ममा पाँच सय ७५ जना विद्यार्थी अध्ययनरत रहेको र सिर्पाइलीको सहयोगले विद्यालयमा विद्यालयमा अध्ययनरत विद्यार्थीलाई सहयोग पुग्ने विद्यालयले विश्वस लिएको छ ।
सिर्पाइलीले सहयोग गर्ने सबैलाई धन्यबाद दिँदै सहयोग गर्न चहाने सहयोगी मनहरुलाई बम बहादुर वि.क. को नाममा रहेको राष्ट्रिय वाणिज्य बैंकको खाता नं १६८००१८८१७१० रकम जम्मा गरिदिन आग्रह समेत गरेका छन् । साथै उनले सहयोगका लाथि थप जानकारी लिनु परेमा ९८५४०४३८४१ मा सम्पर्क गर्न पनि अनुरोध गरेका छन् ।
आफ्नो प्रतिकृया दिनुहोस्