रामेछाप– रामेछाप नगरपालिकाले आगामी आर्थिक वर्ष २०७७/७८ का लागि तया गरिएको नीति तथा कार्यक्रममा स्वास्थ्य, कृषि, रोजगारी र पूर्वधारलाई प्राथमिकता दिँदै ६० करोड माथिको बजेट ल्याएको छ । बुधरबार सम्पन्न सातौ नगरसभाले कोरोनाको कारण आउन सक्ने स्वास्थ्य समस्या, बेरोजगारी र त्यसबाट सिर्जना हुने खाद्य संकटलाई समधान गर्ने गरी स्वास्थ्य, कृषि, रोजागरी र पूर्वधारलाई प्राथमिकतामा राखेर ६० करोड १५ लाख ११ हजार ४ सय ६० रुपैयाँ बराबरको बजेट ल्याएको हो ।
नीति तथा कार्यक्रम प्रस्तु गर्दै उपप्रमुख सृजना खड्काले “कृषि, पर्यटन, सडक, खानेपानी हाम्रो पूर्वाधार, रामेछाप नगर विकासको दिगो आधार” भन्ने मूल नाराका साथ ल्याइएको बजेटले कोरोनाको कहरपछि प्रभावित भएकाहरुलाई रोजगारीका अवसर बढाउन कृषि र रोजगारलाई प्राथमिकतामा राखेको बताउनुभयो ।
सातौ नगर सभाका अध्यक्ष एवं रामेछाप नगरपालिकाका नगर प्रमुख नर बहादुर थापामगरले कोरोना रोकथाम, नियन्त्रण, प्रतिकार्य र उपचारलाई प्रभावकारी बनाउने योजनालाई नीति तथा कार्यक्रममा समबेस गरिएको बताउँदै उक्त कार्यक्रम सफल बनाउनको लागि नगरको सिंगो टिम लाग्ने प्रतिबद्धता जनाउनुभयो ।
कार्यक्रममा प्रमुख प्रशासकीय अधिकृत दिपेन्द्र पौडेल, वडा नं १ देखि वडा नं ९ सम्मका सबै वडाध्यक्ष, कार्यपालिका सदस्य, वडा सदस्य लगायतको सहभागीता रहेको थियो ।
