रामेछाप– जिल्ला अस्पताल रामेछापमा रहेका १३ जनाले कोरोनालाई जितेका छन् । भारतबाट आइ गाउँपालिकाले बनाएको क्वारेन्टाइनमा बसेका १७ जनामा जेठ २३ गते कोरोना संक्रमण देखिएपछि जिल्ला अस्पतालमा उपचारको लागि राखिएकाहरुको दोस्रो पटक पिसिआर जाँच गर्दा रिपोर्ट नेगेटिभ आएको जिल्ला अस्पताल रामेछापले बताएको छ ।
अस्पतालको आइसोलेशनमा राखिएको १२ औं दिनमा १६ जना संक्रमितको स्वाब जाँचको लागि धुलिखेल अस्पताल पठाईएको र उनिहरु मध्ये १३ जनाको रिपोर्ट नेगेटिभ आएपछि उनिहरुलाई घर पठाउने तयारी भईरहेको जिल्ला अस्पताल रामेछापका डा. आनन्द आचार्यले बताए । पिसिआर जाँचको लागि धुलिखेल अस्पताल स्वाब पठाईएका १६ मध्ये ३ जनाको रिपोर्ट आउन बाँकी नै रहेको पनि डा. आचार्यको भनाई रहेको छ । डा. आचार्यका अनुसार रिपोर्ट नेगेटिभ आउनेमा गोकुलगंगा गाउँपालिकाका ११ जना र लिखुतामाकोशी गाउँपालिकाका २ जना रहेका छन् ।
१३ जनाको रिपोर्ट नेगेटिभ आएसँगै अब जिल्लाका ९ जना मात्रै संक्रमित रहेका छन् ।
