रामहरि केसी, रामेछाप- रामेछापको वडा नम्बर ७ सुकाजोरका स्थानीय आफ्नै घरमा पैसा पाउँदा निकै खुसी छन् । यो खुसी उनिहरुमा त्यतिकै आएको हैन् । आफैले भोट दिएर जिताएका जनप्रतिनिधिले चुनाव अघि गरेका बाचा पूरा गरेपछि उनिहरुको मुहारमा खुसी छाएको हो ।
वडाअध्यक्ष सहितको टोली सुकाजोरका विभिन्न बस्तीहरुमा हरेक चार महिनामा राज्यले उपब्ध गराउने सामाजिक सुरक्षा भत्ता लिएर पुग्छ । भत्ता बोकेर विभिन्न टोलका घर–घरमा पुग्दा कार्यालय सम्म जान नसक्ने जेष्ठ नागरिक, एकल महिला, लोपउन्मुख हायु जाती लगायतका नागरिकहरु निकै खुसी देखिन्छन् ।
आफ्नै गाउँमा भत्ता पाएपछि बिर्ताका राम बहादुर हायुले खुसी हुँदै भन्नुभयो– ‘चार–चार महिनामा पैसा लिनको लागि दिन माया मारेर पैसा खर्च गरेर वडा कार्यालय सम्म जानु पथ्र्यो, अहिले हामीले त्यो झन्झट बेहोर्नु पर्दैन् । हाम्रा लागि यो भन्दा खुसी अरु के हुन्छ र ?’
सडक खन्नु मात्रै विकास हैन, नागरिकका स–साना समस्यालाई समधान गर्न सक्यौ भने त्यस्ता कामले नागरिकहरु निकै खुसी हुने रहेछन् वडाध्यक्ष समिरि कार्कीले भन्नुभयो, ‘ त्यहि खुसी हामीलाई काम गर्ने उर्जा बन्दो रहेछ ।’
गाउँमा भत्ता लिएर जाँदा सम्बन्धित व्यक्तिले नै पैसा पाउँने भएकाले त्यो पैसाले उनिहरुलाई निकै सहयोग पुग्ने वडाध्यक्ष कार्कीको भनाई रहेको छ । यसले भत्ताको सहि सदुपयोग हुने पनि वडाध्यक्ष कार्कीको विश्वास रहेको छ । आफू निर्वाचित भएर आए देखि नै निरन्तर रुपमा गाउँमै गएर सुरक्षा भत्ता दिइएको र यसलाई निरन्तरता दिने उहाँको भनाई रहेको छ ।
करिव साँढे एघार सय सामाजिक सुरक्षा लिने मध्ये सात सय ३३ जना लोपउन्मुख हायु जाती रहेको वडा सचिब उत्तम कार्कीले बताउनुभयो । विभिन्न टोलमा लगिने एक चौमासिक सामाजिक सुरक्षा भत्ता वितरण गर्न एक हप्ता लाग्ने बताउनुभयो । विभिन्न टोलमा राखिएको भत्ता वितरण सिविरमा आउन नसक्ने अशक्तहरुको घरमै गएर वितरण गरिएको पनि सचिब कार्कीको भनाई रहेको छ ।
वडा कार्यालयबाट टाढा रहेका बस्तीहरुमा वडाबाट प्रवाह हुने सेवा लिएर प्रत्येक एक महिनामा वडाध्यक्ष र आफू सहितको टोली गाउँमै गएर विभिन्न सेवा समेत दिने गरेको सचिब कार्कीले बताउनुभयो ।
