रामेछाप- रामेछाप अस्पतालले पहिलोपटक नियमित मानसिक स्वास्थ्य विशेषज्ञ सेवा सञ्चालनमा ल्याएको छ । स्थानीयस्तरमै गुणस्तरीय र विशेषज्ञ स्वास्थ्य सेवा उपलब्ध गराउने उद्देश्यले अस्पतालले मानसिक रोग विशेषज्ञको नियमित सेवा सुरु गरेको हो ।
अस्पतालमा डिप्रेसन, चिन्ता तथा तनाव, निद्रासम्बन्धी समस्या, प्यानिक अट्याक, ओसीडी, बाइपोलार डिसअर्डर, स्किजोफ्रेनियालगायत मानसिक स्वास्थ्य समस्याको उपचार गरिने गरि उक्त सेवा दिन लागिएको रामेछाप अस्पतालका मेडिकल सुपरिटेन्डेन्ट डा. सागर जर्घा मगरले बताए । मेसु जर्घा मगरले बाल तथा किशोर मानसिक स्वास्थ्य, वृद्धावस्थामा देखिने मानसिक समस्या तथा मदिरा र लागू पदार्थको दुर्व्यसनसम्बन्धी उपचार सेवासमेत उपलब्ध बताए । मेडिकल सुपरिटेन्डेन्ट जर्घामगरले मानसिक स्वास्थ्यसम्बन्धी समस्या लुकाएर राख्नुभन्दा समयमै पहिचान गरी विशेषज्ञसँग परामर्श लिनुपर्ने बताए । मानसिक स्वास्थ्य समस्या कमजोरी नभई अन्य स्वास्थ्य समस्याजस्तै उपचार र हेरचाह आवश्यक पर्ने अवस्था भएकाले समयमै उपचार पाए जीवनस्तरमा उल्लेख्य सुधार ल्याउन सकिने उनको भनाइ छ ।
अस्पतालमा वरिष्ठ मानसिक रोग विशेषज्ञ डा. विजया सत्यालबाट मानसिक स्वास्थ्यसम्बन्धी विशेषज्ञ परामर्श तथा उपचार सेवा प्रदान गरिनेछ । एमडी मनोचिकित्सा अध्ययन गर्नुभएकी डा. सत्यालबाट विभिन्न मानसिक स्वास्थ्य समस्या भएका सेवाग्राहीले विशेषज्ञ सेवा लिन सक्ने अस्पतालले जनाएको छ ।
अस्पतालमा मानसिक स्वास्थ्य विशेषज्ञ सेवा प्रत्येक दिन बिहान ९ बजेदेखि साँझ ५ बजेसम्म सञ्चालन हुनेछ । सेवा अस्पतालको मानसिक स्वास्थ्य कक्षबाट उपलब्ध हुने जनाइएको छ । विशेषज्ञसँग परामर्श तथा अपोइन्टमेन्टका लागि ९७६५२०३३८४८ मा सम्पर्क गर्न सकिने अस्पतालले जनाएको छ ।
